ធនាគារអភិវឌ្ឍន៍អាស៊ី (ADB) ទទួលបា​នថវិកាសរុបចំនួន ១៩០ លានដុល្លារ ដែល​ក្នុងនោះ ៨៥ លានដុល្លារ ជាហិរញ្ញប្បទាន​ឥត​សំណង និង ១០៥ លានដុល្លារ ជាហិរញ្ញប្បទានសម្បទា​នពីមូលនិធិអាកាសធាតុបៃតង (GCF) សម្រាប់​​អនុវត្តគម្រោងប្រែប្រួលអាកាសធាតុនៅកម្ពុជា ម៉ុងហ្គោលី និងតាជីគីស្ថាន ដែលជួយបង្កើន​កិច្ច​ខិត​ខំប្រឹងប្រែងរបស់ ADB ក្នុងការកៀរគរហិរញ្ញប្បទានអាកាសធាតុឱ្យបានកាន់តែច្រើន​ សម្រាប់តំបន់​អាស៊ី និងប៉ាស៊ីហ្វិក។

លោក Bambang Susantono អនុប្រធាន ADB ទទួលបន្ទុកការគ្រប់គ្រងចំណេះដឹង និង​ការអភិវឌ្ឍ​ប្រកបដោយចីរភាពមានប្រសាសន៍ថា​ ផែនការប្រកបដោយមហិច្ឆតារបស់ ADB គឺផ្ដល់ហិរញ្ញប្ប​ទាន​ប្រចាំឆ្នាំ សម្រាប់គម្រោងអាកាសធាតុឱ្យបាន ៦ពាន់លានដុល្លារ ត្រឹមឆ្នាំ ២០២០ ចេញពីធនធានផ្ទាល់​របស់​ខ្លួន។

ហិរញ្ញប្បទានដែលបានពីមូលនិធិ GCF នឹងបំពេញបន្ថែមដល់កិច្ច​ខិតខំប្រឹងប្រែងនេះ ដើម្បី​ជួយប្រទេស​កំពុងអភិវឌ្ឍន៍ជាសមាជិករបស់យើង ឱ្យអាចឆ្លើយតបផលប៉ះពាល់ដែលបង្កឡើង​ដោយការ​ប្រែប្រួលអាកាសធាតុ និងបំពេញទៅតាមការប្ដេជ្ញាចិត្តរបស់ខ្លួន​ ក្រោមក្របខ័ណ្ឌកិច្ចព្រមព្រៀង​​អាកាសធាតុ​ទីក្រុងប៉ារីស។

កាលពីឆ្នាំ ២០១៧ ADB បានផ្ដល់ហិរញ្ញប្បទានអាកាសធាតុជាង ៤,៥ពាន់លានដុល្លារ ពី​ធនធាន​ផ្ទាល់របស់ខ្លួន ដែលក្នុងនោះ ៣,៦ពាន់លានដុល្លារ សម្រាប់ការកាត់បន្ថយផលប៉ះពាល់ និង ៩៣០លានដុល្លារ សម្រាប់ការបន្សាំ និងបានកៀរគរថវិកាចំនួន ៦៩៦លានដុល្លារបន្ថែមទៀត ពីប្រភព​ខាង​ក្រៅ។

នៅកម្ពុជា មូលនិធិ GCF នឹងផ្ដល់ហិរញ្ញប្បទានឥតសំណង ៣០ លានដុល្លារ និងហិរញ្ញប្បទានសម្បទាន ១០ លានដុល្លារ ដើម្បីបំពេញបន្ថែមដល់ហិរញ្ញប្បទានសម្បទាន ៩០ លានដុល្លារ ដែល ADB បានផ្ដល់ ដើម្បី​ជួយ​អភិវឌ្ឍន៍សង្វាក់ផ្គត់ផ្គង់កសិពាណិជ្ជកម្ម ដែលអំណោយផលចំពោះអាកាសធាតុ។

មូលនិធិ GCF នឹង​ត្រូវ​​ប្រើប្រាស់ ដើម្បីបង្កើនភាពធន់ និងផលិតភាពនៃការបង្កបង្កើនដំណាំគោលដៅ ស្ដារ​ហេដ្ឋារចនាសម្ព័ន្ធ​​ផលិតកម្មនិងក្រោយប្រមូលផលឱ្យអាចធន់ទ្រាំទៅនឹងអាកាសធាតុ និងកាត់បន្ថយបរិមាណកាបូន ដែល​បំភាយ​​ក្នុងសង្វាក់ផ្គត់ផ្គង់ តាមរយៈការជំរុញឱ្យមានការប្រើប្រាស់បច្ចេកវិទ្យាពន្លឺព្រះអាទិត្យ និង​ជីវថាមពល។

ជំនួយសម្រាប់គម្រោងទាំងបី គឺបន្ថែមពីលើហិរញ្ញប្បទានឥតសំណង ៧៥ លានដុល្លារ ដែល​មូលនិធិ GCF បានអនុម័តផ្ដល់ដល់គម្រោង ADB នៅតំបន់ប៉ាស៊ីហ្វិក ដែល​ក្នុងនោះមាន​ហិរញ្ញប្បទាន​ឥតសំណង​សម្រាប់ការបន្សាំទៅនឹងការប្រែប្រួលអាកាសធាតុ ក្នុងទឹកប្រាក់ ៣១ លានដុល្លារ កាលពីខែ វិច្ឆិកា ឆ្នាំ ២០១៥ ដើម្បីកែលម្អការគ្រប់គ្រងការផ្គត់ផ្គង់ទឹកស្អាត និងទឹកស្អុយក្នុងទីក្រុង ក្នុងប្រទេស​ហ្វីជី ដែល​​គ្របដណ្ដប់ប្រជាពលរដ្ឋប្រមាណ ៨៦០.០០០ ស្មើនឹង ១ ភាគ ៣ នៃចំនួនប្រជាពលរដ្ឋសរុប​ក្នុង​ប្រទេស​នេះ។

កិច្ចប្រជុំលើកទី ១ កាលពីឆ្នាំ ២០១៨ ក្រុមប្រឹក្សាភិបាលនៃមូលនិធិ GCF បានអនុម័តលើគម្រោង​ចំនួន ២៣ ដែលមានតម្លៃសរុប ១ ពាន់លានដុល្លារ ដែលគាំទ្រពីហិរញ្ញប្បទានរបស់មូលនិធិ GCF នេះ។​ ADB គឺជាស្ថាប័នមួយក្នុងចំណោមស្ថាប័នចំនួន ៥៩ ដែលមូលនិធិ GCF បានទទួលស្គាល់ថាអាចជាច្រក​សម្រាប់យកធនធានពី GCF ទៅប្រើប្រាស់ ដើម្បីអនុវត្តគម្រោង និងកម្មវិធីនានា នៅតាមបណ្ដាប្រទេស​កំពុងអ​ភិវឌ្ឍន៍។

មានមូលដ្ឋាន​ក្នុងទីក្រុងសុងដូ មូលនិធិ GCF ជាមូលនិធិសកល ដែលត្រូវ​បង្កើតឡើង​ដើម្បីគាំទ្រ​ដល់​កិច្ចខិតខំប្រឹងប្រែង​របស់ប្រទេស​កំពុងអភិវឌ្ឍន៍ ​ក្នុងការ​ឆ្លើយតប ចំពោះបញ្ហាប្រឈមនៃ​ការប្រែប្រួល​អាកាសធាតុ។ មូលនិធិនេះត្រូវ​បានបង្កើតឡើង​ក្នុងឆ្នាំ ២០១០ ដោយរដ្ឋាភិបាលចំនួន ១៩៤ ប្រទេស ដើម្បីកំហិត ឬកាត់បន្ថយការបំភាយឧស្ម័ន​ផ្ទះកញ្ចក់ក្នុងប្រទេស​កំពុង​អភិវឌ្ឍន៍ និងជំរុញឱ្យមានលំហូរ​ហិរញ្ញប្បទានអាកាសធាតុ ដើម្បីវិនិយោគលើការអភិវឌ្ឍ ដែលនាំឱ្យមានការបំភាយឧស្ម័នក្នុងកម្រិតមួយ​ទាប និងដែលធន់ទៅនឹង​អាកាសធាតុ៕