កម្ពុជា និងហុងកុង បានប្តេជ្ញាបន្តពង្រឹងកិច្ចសហប្រតិបត្តិការពាណិជ្ជកម្មទ្វេភាគី បន្ថែមទៀត ដើម្បីនាំមកនូវអត្ថប្រយោជន៍រួមដល់សេដ្ឋកិច្ចរវាងភាគីទាំងពីរ ខណ:ដែលទំហំពាណិជ្ជកម្មហុងកុងនៅកម្ពុជា ស្មើប្រមាណជា ២ភាគរយ នៃទុនវិនិយោគផ្ទាល់សរុបពីក្រៅប្រទេស។ នេះបើយោងតាមការលើកឡើងរបស់ លោក Edward Yau អគ្គលេខាធិការពាណិជ្ជកម្ម និងអភិវឌ្ឍន៍ សេដ្ឋកិច្ចនៃតំបន់រដ្ឋបាលពិសេសហុងកុង និងលោកស្រី Margaret Fong នាយកប្រតិបត្តិនៃ HKTDC កាលពីម្សិលមិញនេះ។
លោក Edward Yau បានបញ្ជាក់ថា ប្រមុខអ្នកដឹកនាំហុងកុង នឹងខិតខំធ្វើយ៉ាងណាកៀរគរវិនិយោគិនហុងកុង ឱ្យមកបណ្ដាក់ទុនវិនិយោគនៅកម្ពុជា ឱ្យបានច្រើនបន្ថែមទៀត ខណ:ដែលទំហំពាណិជ្ជកម្មទ្វេភាគីកម្ពុជា-ហុងកុង នៅក្នុងឆ្នាំ២០១៦ មានចំនួនជាង ៧៣០លានដុល្លារ ដែលក្នុងនោះកម្ពុជានាំចេញ ទៅហុងកុងមានទឹកប្រាក់ ២១៣លានដុល្លារ និងនាំចូលពីហុងកុង មានទឹកប្រាក់ជាង៥១៦លានដុល្លារ។
លោកក៏បានបង្ហាញចំណាប់អារម្មណ៍លើការអភិវឌ្ឍ ហេដ្ឋារចនាសម្ព័ន្ធ និងការផ្លាស់ប្តូរទស្សន:លើ វិស័យសេដ្ឋកិច្ចជាមួយកម្ពុជា ហើយនឹងឈ្វេងយល់ឱ្យបានច្បាស់ អំពីសក្តានុពលវិនិយោគសម្រាប់ អ្នកជំនាញផ្នែក វិស្វកម្មផងដែរ។
យោងតាមតួលេខដែលកត់ត្រាដោយក្រុមប្រឹក្សាអភិវឌ្ឍន៍កម្ពុជា បានបង្ហាញថា ការវិនិយោគរបស់ហុងកុងនៅកម្ពុជា ពីឆ្នាំ១៩៩៤ ដល់ឆ្នាំ២០១៧ មានចំនួន ២៥៧គម្រោង មានទុនវិនិយោគសរុបប្រមាណ ១.៣៣ពាន់លានដុល្លារអាមេរិក ស្មើនឹង ២.១៤ភាគរយនៃទុនវិនិយោគសរុប។
ដោយឡែកការវិនិយោគរបស់ហុងកុង ក្នុងឆ្នាំ២០១៧ មានជំនួន ១៣គម្រោង ក្នុងវិស័យកាត់ដេរសម្លៀកបំពាក់ ស្បែកជើង កាបូប និងឧស្សាហកម្មដទៃទៀត ក្នុងទឹកប្រាក់វិនិយោគប្រមាណ ៨៥លានដុល្លារអាមេរិក ស្មើនឹង ១.៦៤ភាគរយ នៃទុនវិនិយោគសរុបប្រចាំ ឆ្នាំ២០១៧។
គួរជម្រាបដែរថា បេសកកម្មជំនួញមួយ ដែលរៀបចំដោយក្រុមប្រឹក្សាអភិវឌ្ឍន៍ពាណិជ្ជកម្មហុងកុង (HKTDC) ដែលធ្វើឡើងកាលពីម្សិលមិញនេះ មានភ្ញៀវកិត្តិយសប្រមាណជាង ៣០០នាក់ចូលរួម ដើម្បីស្វែងរកឱកាសសម្រាប់កិច្ចសហប្រតិបត្តិការ វិនិយោគនិងផលិតកម្មរវាងកម្ពុជា និងហុងកុង។
សិក្ខាសាលានេះ បានសហការរៀបចំដោយ សមាគមពាណិជ្ជកម្មហុងកុងនៅកម្ពុជា Hong Kong Business Association in Cambodia (HKBAC) ដែលនឹងពិភាក្សាសំខាន់អំពី ឱកាសសហការគ្នាក្នុងការផលិត និងការវិនិយោគ មានដូចជាផ្នែកហិរញ្ញវត្ថុ ធនាគារ និងហេដ្ឋារចនាសម្ព័ន្ធ ការអភិវឌ្ឍន៍ និងផ្នែកច្បាប់ពាណិជ្ជកម្មសំខាន់ៗមួយចំនួនទៀត។
ទីក្រុងហុងកុង គឺជាមជ្ឈមណ្ឌលពាណិជ្ជកម្ម និងជាតំបន់ពាណិជ្ជកម្មរវាងចិនដីគោក អាស៊ី និងពិភពលោក ហើយនៅក្នុងសិក្ខាសាលានេះ នឹងពង្រឹងបន្ថែមទៀតក្រោមគម្រោងគំនិតផ្តួចផ្តើមផ្លូវមួយខ្សែក្រវ៉ាត់មួយ។
តាមយរយ:មូលដ្ឋានគ្រឹះដ៏រឹងមាំ ដូចជាប្រព័ន្ធច្បាប់ កម្រិតរបរបង់ពន្ធទាប កម្រិតខ្ពស់នៃហេដ្ឋារចនាសម្ព័ន្ធហិរញ្ញវត្ថុ និងការវិនិយោគជឿនលឿន ទាំងបណ្ដាញអ្នកអភិវឌ្ឍជាតិ និងអន្ដរជាតិ រួមជាមួយនឹងលំហូរព័ត៌មានសេរី ចំពោះទីផ្សារនៃការវិនិយោគទំនិញនានា ហុងកុងបានបង្កើតជាទម្រង់នៃបណ្ដុំព័ត៌មានមូលធនចំពោះការវិនិយោគ និងហិរញ្ញវត្ថុ សម្រាប់អ្នកវិនិយោគសកល។
ដោយសារកម្ពុជាជាមូលដ្ឋានផលិតកម្ម ដែលពេញនិយម សម្រាប់ឧស្សាហកម្មផលិតកម្មបេសកកម្មនេះនឹងជួយក្រុមហ៊ុនកម្ពុជា និងហុងកុងពិនិត្យមើល លទ្ធភាពនៃការសហការផលិតកម្ម និងការពង្រីកផលិតកម្មតាមរយ:ការធ្វើសន្និសីទសារព័ត៌មានកិច្ចប្រជុំពាណិជ្ជកម្ម និងដំណើរទស្សនកិច្ចទៅកាន់រោងចក្រ និងតំបន់សេដ្ឋកិច្ចពិសេស៕
មតិយោបល់