បរទេសៈ ចំនួនមេជីវិតឈ្មោលរបស់បុរសអាចត្រូវបានចុះថយ ឬខ្សោយគុណភាព ដោយសារតែកត្តាធំៗជាច្រើន រួមមាន ទម្លាប់អាក្រក់ក្នុងការរស់នៅ ការប្រើប្រាស់ទូរស័ព្ទដៃ ការទទួលទានគ្រឿងស្រវឹងច្រើនពេក ការស្រូបយកជាតិពុលជាដើម។

ហេតុដូច្នេះ ប្រសិនបើអ្នកមិនចង់ជួបបញ្ហាខ្សោយមេជីវិត ហើយមិនចង់អត់កូនប្រើ គួរតែជៀសវាងទម្លាប់ទាំងនេះ។

ប្រើទូរស័ព្ទ និងកុំព្យូទ័រយួរដៃ
ជាធម្មតាបុរសៗតែងមានទម្លាប់ដាក់ទូរស័ព្ទដៃនៅក្នុងហោប៉ៅ ប៉ុន្តែតើអ្នកដឹងទេ? សារធាតុវិទ្យុសកម្មដែលភាយចេញពីទូរស័ព្ទដៃ អាចប៉ះពាល់ដល់ដំណើរការផលិតនៃមេជីវិតឈ្មោល ហើយអាចកាត់បន្ថយគុណភាពនៃមេជីវិតឈ្មោល។

ទម្លាប់មួយទៀតនៅពេលដែលអ្នកប្រើកុំព្យូទ័រយួរដៃនៅលើភ្លៅយូរពេក អាចបង្កើនសីតុណ្ហភាពពងស្វាល ដែលអាចបង្កឲ្យចំនួនគុណភាពមេជីវិតឈ្មោលត្រូវកាត់បន្ថយដូចគ្នា។

ធ្វើការក្នុងបរិស្ថានក្តៅខ្លាំង ប៉ះពាល់លោហធាតុ និងសារធាតុគីមីច្រើន
មនុស្សដែលធ្វើការក្រោមសីតុណ្ហភាពខ្ពស់ជាញឹកញាប់ គុណភាពនៃមេជីវិតឈ្មោលច្បាស់ជាខ្សោយមិនខាន។ មុខរបបទាំងនោះរួមមាន ជាងដែក ជាងផ្សា ចុងភៅ កម្មករធ្វើដែកថែបជាដើម។

ក្នុងករណីប៉ះពាល់ជាមួយនឹងលោហៈធ្ងន់ធ្ងរដូចជា សំណ សារធាតុអាសេនិច អាចបង្កើនហានិភ័យខ្សោយមេជីវិតឈ្មោលដូចគ្នា។ ប្រសិនបើមានលោហធាតុបន្តិចបន្តួចមានវត្តមានក្នុងទឹកកាម អង់ស៊ីមសំខាន់ៗសម្រាប់ដំណើរការនៃការបង្កកំណើតមេជីវិតឈ្មោលនឹងត្រូវរាំងស្ទះ។

ការស្រូបយកជាតិពុលមួយចំនួន
ថ្នាំសម្លាប់សត្វល្អិត ថ្នាំសម្លាប់ស្មៅ សារធាតុគីមីដែលលាបនៅលើសម្ភារៈគ្រឿងសង្ការឹម… ត្រូវបានគេទទួលស្គាល់ថា អាចប៉ះពាល់យ៉ាងខ្លាំងដល់គុណភាពមេជីវិតឈ្មោល។

ការរស់នៅគ្មានផាសុខភាព
ភាពតានតឹង ការទទួលទានអាហារមិនទៀងទាត់ ផឹកស្រាច្រើន ជក់បារី… សុទ្ធតែជាមូលហេតុដែលបណ្តោលឲ្យបាត់ចំនួនមេជីវិតឈ្មោល។
ការផឹកស្រា និងជក់បារី អាចកាត់បន្ថយកម្រិតនៃអ័រម៉ូន testosterone ហេតុនេះហើយទើបមេជីវិតឈ្មោលត្រូវថយចុះ បញ្ហាងាប់លិង្គក៏កើតមានឡើងដែរ។ ជាពិសេសអ្នកអាចប្រឈមនឹងការគ្មានកូន។

ងូតទឹកក្តៅ
ការងូតទឹកក្តៅអាចជួយឲ្យរាងកាយមានពេលសម្រាកក៏ពិតមែន ប៉ុន្តែប្រសិនបើអ្នកមានទម្លាប់ត្រាំនៅក្នុងទឹកក្តៅយូរពេក មេជីវិតឈ្មោលនឹងត្រូវបានកាត់បន្ថយដោយសារតែការកើនឡើងនៃសីតុណ្ហភាពពងស្វាល។

អង្គុយមើលទូរទស្សន៍យូរពេក
ការអង្គុយមើលទូរទស្សន៍យូរពេកអាចនាំឲ្យមានជំងឺធាត់ និងខ្សោយមេជីវិតឈ្មោល។ តាមរយៈការសិក្សាជាច្រើនបានបញ្ជាក់ថា បុរសដែលមានទម្លាប់អង្គុយមើលទូរទស្សន៍យូរ ហើយខ្ជិលហាត់ប្រាស់ទៀតនោះ គុណភាពនៃមេជីវិតឈ្មោលនឹងចុះខ្សោយ៕