សរសៃឈាមពិតជាមានតួនាទីសំខាន់ខ្លាំងណាស់ក្នុងការដឹងជញ្ចូនឈាម ព្រមទាំងអុកស៊ីសែន ពីបេះដូងទៅកាន់គ្រប់ផ្នែកផ្សេងៗទាំងអស់នៃរាងកាយ។ ប៉ុន្តែសរសៃឈាមក៏ងាយនឹងទទួលរងនូវផលប៉ះពាល់ខ្លាំងផងដែរ ប្រសិនបើអ្នកមិនចេះថែរក្សាឲ្យបានត្រឹមត្រូវ ជាពិសេសសម្រាប់អ្នកដែលចូលចិត្តទទួលទានអាហារមិនល្អ។ ទោះជាយ៉ាងណា បើយោងតាមគេហទំព័រ weeklyhealthylife បានបង្ហាញថា មានអាហារ៥ប្រភេទ ដែលជួយសម្អាតសរសៃឈាមបាន ប្រសិនបើអ្នកទទួលទានរាល់ថ្ងៃ។

ផ្លែទទឹម
សារធាតុប្រឆាំងអុកស៊ីតកម្ម និងអាស៊ីត punicic នៅក្នុងទឹកទទឹម អាចជួយទប់ស្កាត់បញ្ហាកកឈាម និងជំងឺរឹងក្រិនសរសៃឈាម។ ជាពិសេសសារធាតុចិញ្ចឹមម៉ាញ៉េស្យូម និងសេលេនីញ៉ូម របស់វាអាចជួយឲ្យបេះដូងមានសុខភាពល្អ។ បើយោងតាមការស្រាវជ្រាវមួយដែលចេញផ្សាយនៅក្នុងកាសែត American Journal of Cardiology កាលពីឆ្នាំ ២០០៩ បានបង្ហាញថា ការទទួលទានទឹកទទឹម ២៤០មីលីលីត្រ ក្នុងមួយថ្ងៃ ពេញរយៈពេល១៨ខែ អាចជួយពន្យឺតការវិវត្តនៃជំងឺសរសៃឈាមចំពោះអ្នកដែលមានហានិភ័យនៃជំងឺទឹកនោមផ្អែម និងសរសៃឈាម។

គ្រាប់ល្ង
បើយោងតាមការស្រាវជ្រាវដែលបានចុះផ្សាយក្នុងទស្សនាវដ្តី Journal of Medicinal Food កាលពីឆ្នាំ ២០០៦បានបង្ហាញថា គ្រាប់ល្ងមានសមត្ថភាពបំផុតក្នុងការការពារមិនឲ្យមានបញ្ហាសរសៃឈាមបេះដូង។ ព្រោះអាស៊ីតខ្លាញ់នៅក្នុងគ្រាប់ល្ង មានប្រសិទ្ធភាពទប់ស្កាត់កូឡេស្តេរ៉ុលអាក្រក់នៅក្នុងឈាម។

ក្រូចឆ្មារ
ការទទួលទានទឹកក្តៅឧណ្ឌៗដែលបន្ថែមក្រូចឆ្មារនៅពេលព្រឹក គឺជាទម្លាប់ដ៏ល្អបំផុតសម្រាប់សុខភាព និងបេះដូង។ ក្រូចឆ្មារ ត្រូវបានគេទទួលស្គាល់ថា អាចកាត់បន្ថយកម្រិតកូឡេស្តេរ៉ុលក្នុងឈាម ហើយជួយការពារសរសៃឈាមអាក់ទែរមិនមានបញ្ហា។ លើសពីនេះទៅទៀត ក្រូចឆ្មារ មានផ្ទុកវីតាមីន C ដ៏សម្បូរបែប ដែលអាចជួយពង្រឹងសរសៃឈាម បង្កើនប្រូតេអ៊ីនខ្ពស់ ទប់ស្កាត់ការបញ្ចូលផ្លាកែត និងកាត់បន្ថយការរលាក។

ខ្ញី
មើមខ្ញី មានប្រសិទ្ធភាពខ្លាំងបំផុតក្នុងការប្រឆាំងនឹងការរលាក ព្រមទាំងប្រឆាំងអុកស៊ីតកម្មមិនគួរឲ្យជឿ។ តាមការស្រាវជ្រាវដែលចុះផ្សាយក្នុងទស្សនាវដ្តី Journal of Nutrition ក្នុងឆ្នាំ២០០០ បានរកឃើញថា ខ្ញី អាចកាត់បន្ថយកូឡេស្តេរ៉ុល និងទ្រីក្លីសេរីន (triglycerides) នៅក្នុងឈាម។

ខ្ទឹមស
ខ្ទឹមស ក៏ត្រូវបានគេចាត់ទុកជាអាហារដែលល្អបំផុតក្នុងការសម្អាតសរសៃឈាមអាក់ទែរផងដែរ។ អ្នកបានរកឃើញថា ខ្ទឹមស អាចកាត់បន្ថយសម្ពាធឈាម ជួយការពារជំងឺបេះដូង ប្រឆាំងនឹងបញ្ហាដាច់សរសៃឈាមក្នុងខួរក្បាល និងកាត់បន្ថយជាតិស្ករក្នុងឈាម។ បើយោងតាមការសិក្សាក្នុងឆ្នាំ ១៩៩៧ រកឃើញថា ខ្ទឹមស អាចកាត់បន្ថយហានិភ័យនៃជំងឺដាច់សរសៃឈាមក្នុងខួរក្បាល និងជំងឺគាំងបេះដូង ជាង៥០ភាគរយ៕