មុខងារចម្បងនៃតម្រងនោម គឺចម្រោះឈាម កម្ចាត់ជាតិពុល កោសិកាងាប់ៗ និងបណ្តេញជាតិទឹកដែលើស តាមរយៈទឹកនោមមកវិញ។ ក៏ប៉ុន្តែ តម្រងនោមក៏ងាយនឹងទទួលរងនូវបញ្ហាផងដែរ បើវាធ្វើការច្រើនហួសកម្រិត ជាពិសេសប្រសិនបើអ្នកទម្លាប់ធ្វើរឿងមួយចំនួនដូចខាងក្រោមនេះរាល់ថ្ងៃ តម្រងនោមនឹងខូចដោយមិនដឹងខ្លួន។

ទទួលទានទឹកតិចពេក
ការស្រាវជ្រាវថ្មីមួយបានបង្ហាញថា កង្វះជាតិទឹក ឬសារធាតុរាវក្នុងរាងកាយអាចបណ្តោលឲ្យកើតជំងឺតម្រងនោមរ៉ាំរ៉ៃ។ ហេតុនេះ ចំពោះអ្នកដែលមានទម្លាប់ទទួលទានទឹកតិច គួរតែភ្ញាក់ខ្លួនឡើង បើចង់ឲ្យតម្រងនោមមានសុខភាពល្អ។

ជក់បារី
អ្នកឯកទេសបានព្រមានថា ការជក់បារី ឬផលិតផលថ្នាំជក់ដទៃទៀត អាចកាត់បន្ថយមុខងារតម្រងនោម ហើយបើស្ថានភាពបែបនេះនៅតែអូសបន្លាយយូរតម្រងនោមនឹងខូចតែម្តង។

ហាត់ប្រាណខ្លាំងពេក
ជាធម្មតាទម្លាប់ហាត់ប្រាណជាប្រចាំអាចជួយឲ្យរាងកាយមានសុខភាពល្អ ក៏ប៉ុន្តែប្រសិនបើអ្នកធ្វើការហាត់ប្រាណលើសដែនកំណត់ វាអាចបង្កខូចខាតដល់តម្រងនោមធ្ងន់ធ្ងរ។ ដូច្នេះ ដើម្បីសុវត្ថិភាព អ្នកគួរតែពិគ្រោះជាមួយគ្រូពេទ្យអំពីទម្លាប់នៃការហាត់ប្រាណឲ្យបានត្រឹមត្រូវ។

គេងតិចពេក
បើយោងតាមការសិក្សាមួយបានព្រមានថា មនុស្សដែលគេងតិចជាង៦ម៉ោងក្នុងមួយយប់ ឬលើស១០ម៉ោងក្នុងមួយថ្ងៃ អាចបណ្តោលឲ្យហើមតម្រងនោម ដែលជារោគសញ្ញាព្រមានដំបូងនៃជំងឺតម្រងនោម។

ទទួលទានប្រូតេអ៊ីនច្រើនពេក
ការទទួលទានប្រូតេអ៊ីនច្រើនពេក ក៏អាចបណ្តោលឲ្យខូចខាតតម្រងនោមដែរ ព្រោះតម្រងនោមត្រូវធ្វើការធ្ងន់ក្នុងការបំបែកប្រូតេអ៊ីន ហើយយូរៗទៅមុខងាររបស់វានឹងខ្សោយបន្តិចម្តងៗ។ ហេតុនេះ អ្នកត្រូវចង់ចាំថា អាហារដែលមានផ្ទុកប្រូតេអ៊ីនខ្ពស់ ហើយអ្នកត្រូវតែកំណត់ការទទួលទានគឺ សាច់។

ញ៉ាំជាតិស្ករច្រើនពេក
ការទទួលទានអាហារដែលមានជាតិស្ករច្រើនពេក អាចបណ្តោលឲ្យមានបញ្ហាតម្រងនោមដូចគ្នា។ មានន័យថា អ្នកត្រូវកំណត់ការទទួលទានស្ករគ្រាប់ សូកូឡា និងបង្អែម ដើម្បីតម្រងនោមមានសុខភាពល្អ។

ចូលចិត្តទទួលទានអាហារប្រៃ
ការប្រើប្រាស់អំបិលនៅក្នុងអាហារច្រើនពេក អាចប៉ះពាល់ដល់តម្រងនោមខ្លាំងបំផុត។ ព្រោះតម្រងនោមត្រូវធ្វើការហួសធ្ងន់ ដើម្បីច្រោះយកជាតិសូដ្យូមដែលមាននៅក្នុងអំបិលចេញមកវិញ។ ហេតុនេះ ដើម្បីសុវត្ថិភាព អ្នកគួរតែកំណត់ការទទួលទានអំបិលត្រឹមតែ៥ក្រាមក្នុងមួយថ្ងៃបានហើយ៕

ប្រភពៈ pinoyhealthguide