ស្ត្រេស គឺជាជំងឺដ៏អាក្រក់បំផុតដែលអាចធ្វើឲ្យប៉ះពាល់ដល់សុខភាពផ្លូវចិត្ត សុខុមាលភាពរាងកាយ ការគេង និងការរួមភេទផងដែរ។

បើយោងតាមគេហទំព័រ soha បានបង្ហាញថា ស្ត្រេសអាចកាត់បន្ថយកម្រិតអ័រម៉ូន testosterone ដែលធ្វើឲ្យមនុស្សប្រុសបាត់បង់ចំណង់ផ្លូវភេទ និងសមត្ថភាពក្នុងការរួមភេទ។ លើសពីនេះទៅទៀត នៅពេលដែលស្ត្រេសកំពុងតែកើតមានឡើង អ័រម៉ូន adrenalin នឹងបញ្ចេញពេញរាងកាយ ធ្វើឲ្យរាំងស្ទះដល់លំហូរឈាមទៅកាន់សរីរាង្គបន្តពូជ។

ស្ត្រេស អាចធ្វើឲ្យអ័រម៉ូនគ្រប់គ្រងអារម្មណ៍នៅក្នុងរាងកាយ មានការថយចុះយ៉ាងឆាប់រហ័ស ហើយប្រសិនបើអ្នកមិនប្រញាប់ដោះស្រាយទេ វានឹងធ្វើឲ្យប៉ះពាល់យ៉ាងខ្លាំងដល់រាងកាយទាំងមូល។ ជាពិសេសសម្រាប់ស្ត្រីដែលមានបញ្ហាស្ត្រេស នឹងបាត់បង់ចំណង់ផ្លូវភេទ មិនអាចសម្រេចដល់ចំណុចកំពូល និងមានការឈឺចាប់ក្នុងអំឡុងពេលរួមភេទ។

ស្ត្រេស មានផលអវិជ្ជមានដល់ផ្លូវចិត្ត រាងកាយ ហើយសូម្បីតែគេងក៏មិនបានលក់ស្រួលដែរ។ ការគេងមិនលក់នេះហើយ អាចជះឥទ្ធិពលទៅលើអារម្មណ៍ផ្លូវភេទ និងសមត្ថភាពក្នុងការរួមភេទ។ លើសពីនេះទៅទៀត វាអាចធ្វើបុរសមានបញ្ហាងាប់លិង្គ មិនថាអ្នកមានវ័យក្មេង ឬក៏ចាស់នោះទេ ឲ្យតែឧស្សាហ៍កើតមានបញ្ហាស្ត្រេស។

ទោះជាយ៉ាងណា អ្នកអាចទប់ស្កាត់បញ្ហាខូចមុខងារផ្លូវភេទបាន មុននឹងវាឈានដល់ដំណាក់កាលធ្ងន់ធ្ងរ តាមរយ:ការទទួលទានអាហារដែលមានសុខភាពល្អ គេងឲ្យបានគ្រប់គ្រាន់ កាត់បន្ថយភាពតានតឹង និងរក្សាអ័រម៉ូន នៅក្នុងរាងកាយឲ្យមានតុល្យភាព។

គួរបញ្ជាក់ផងដែរថា បញ្ហាចំណង់ផ្លូវភេទកំពុងតែកើនឡើងយ៉ាងខ្លាំងចំពោះមនុស្សរាប់លាននាក់នៅជុំវិញពិភពលោកជារៀងរាល់ឆ្នាំ៕