បរទេស: ក្រុមអ្នកជំនាញបានបញ្ជាក់ថា ប្រសិនបើអ្នកទម្លាប់ធ្វើលំហាត់ប្រាណយោគ: ឬលំហាត់ប្រាណផ្សេងៗពីមុនមក ចាំបាច់ត្រូវតែបន្ត បើទោះជាអ្នកមានផ្ទៃពោះត្រីមាសទី ៣ ឬទី៤ ក៏ដោយ។ ប៉ុន្តែ អ្នកត្រូវតែកំណត់ការធ្វើលំហាត់ប្រាណឲ្យច្បាស់។

នៅពេលដែលពោះរបស់អ្នកកាន់តែធំ រាងកាយត្រូវទទួលបន្ទុកកាន់តែខ្លាំង។ អ្នកអាចប្រឈមនឹងមានអាការ:ហើមជើង, ឈឺខ្នង, មានអារម្មណ៍មិនស្រួល និងអស់កម្លាំង។ នៅពេលនេះ វិធីដ៏ល្អតែម្យ៉ាងគត់ដែលអ្នកត្រូវធ្វើ គឺសម្រាក។

អ្នកជំនាញបន្ថែមទៀតថា ស្ត្រីដែលធ្វើលំហាត់ប្រាណទៀងទាត់ អាចជួយឲ្យកូនកើតមកស្រួល។ ប៉ុន្តែ ប្រសិនបើអ្នកមានបញ្ហាមួយចំនួន អ្នកគួរតែបញ្ឈប់ការធ្វើលំហាត់ប្រាណភ្លាម ដើម្បីសុវត្ថិភាពដល់ទារក។

វិលមុខ៖ ប្រសិនបើអ្នកមានអារម្មណ៍ថា វិលមុខ រាល់ពេលដែលធ្វើលំហាត់ប្រាណ អ្នកត្រូវតែសម្រាកភ្លាម។ ព្យាយមទទួលទានទឹកតិចៗ និងដកដង្ហើមជ្រៅៗ ដើម្បីរំងាប់ប្រព័ន្ធប្រសាទរបស់អ្នក។

ឈឺក្បាល៖ រួមជាមួយនឹងអារម្មណ៍ធុញទ្រាន់ ធ្វើស្ត្រីមានផ្ទៃពោះប្រឈមនឹងមានអាការ:ឈឺក្បាល។ ក្នុងពេលនេះដែរ ប្រសិនបើអ្នកធ្វើលំហាត់ប្រាណបែកញើសច្រើន នឹងខ្សោះជាតិទឹកក្នុងខ្លួន ដែលជាហេតុនាំឲ្យឈឺក្បាល។

ឈឺទ្រូង៖ អាការ:ឈឺទ្រូង គឺជាក្តីបារម្ភទូទៅ ដែលស្ត្រីមានផ្ទៃពោះភាគច្រើនត្រូវប្រឈម ជាពិសេសនៅចុងត្រីមាសទី២។ បញ្ហានេះ កើតឡើងដោយសារតែទម្ងន់របស់ស្បូនត្រូវដាក់បន្ទុកជុំវិញ ហើយអាចប៉ះពាល់ដល់ខ្នង ព្រមទាំងដើមទ្រូង។

ពិបាកដកដង្ហើម៖ ការពិបាកដកដង្ហើមគឺជាមូលហេតុមួយផ្សេងទៀត ដែលស្ត្រីភាគច្រើនគួរតែបញ្ឈប់ធ្វើលំហាត់ប្រាណ។ បើសិនជាអ្នកប្រឈមមុននឹងបញ្ហាដកដង្ហើមពេលហាត់ប្រាណ អ្នកគួរតែឲ្យរាងកាយសម្រាក និងដកដង្ហើមមួយៗ។

ហូរឈាមតាមទ្វារមាស៖ ការហូរឈាមតាមទ្វារមាសអំឡុងពេលមានផ្ទៃពោះ គឺជាកត្តាដ៏គួរឲ្យបារម្ភបំផុត។ ប្រសិនបើអ្នកបានឃើញការហូរឈាមខណ:ដែលកំពុងធ្វើលំហាត់ប្រាណ ចាំបាច់ត្រូវប្រាណទៅមន្ទីរពេទ្យភ្លាម ព្រោះអ្នកអាចនឹងរលូតកូន។

បេះដូងលោតញាប់៖ អត្រាបេះដូងលោតញាប់ គឺជាការព្រមានមួយទៀត ដែលអ្នកគួរតែបញ្ឈប់ការធ្វើលំហាត់ប្រាណជាបន្ទាន់។ ព្រោះវាអាចមានផលប៉ះពាល់យ៉ាងធ្ងន់ធ្ងរ បើអ្នកនៅតែបន្តទៀត៕