ឥណ្ឌូនេស៊ីៈ អនុប្រធានាធិបតីឥណ្ឌូនេស៊ីលោក Jusuf Kalla កាលពីថ្ងៃពុធ បានស្តីបន្ទោសបរទេស ចំពោះការបំផ្លិចបំផ្លាញព្រៃ នៅក្នុងប្រទេសរបស់ខ្លួន និងចង់ឱ្យពួកគេសងសំណង ដើម្បីស្តារការខូចខាត ដីព្រៃទាំងនេះផងដែរ។ នេះបើយោងតាមសារព័ត៌មាន Channel News Asia ចេញផ្សាយនៅថ្ងៃទី១ ខែធ្នូ ឆ្នាំ២០១៦។

លោ Kalla បាននិយាយក្នុងកិច្ចប្រជុំសភាឥណ្ឌូនេស៊ីស្តីពី ព្រៃឈើនៅទីក្រុងហ្សាការតាថា «អ្វីដែលបានកើតឡើង នៅទីនេះ គឺមិនត្រឹមតែជាបញ្ហារបស់យើងទេ បរទេសក៏ជាអ្នករួមចំណែក្នុងបញ្ហានេះដែរ» ។

ក្នុងអំឡុងពេលសន្និសីទធំមួយ នៅទីក្រុងតូក្យូ អ្នកចូលរួមម្នាក់ បានលើកឡើងថា ឥណ្ឌូណេស៊ី ត្រូវរៀបចំ និងស្តាព្រៃឈើក្នុងប្រទេសឡើងវិញ ពេលនោះលោក Kalla បានខឹងនៅចំពោះមុខមនុស្សរាប់ពាន់នាក់ ហើយគាត់និយាយតបទៅវិញថា «កៅអីនេះ ទ្វារនេះ បង្អួចនេះ គឺនាំមកពីប្រទេសរបស់ខ្ញុំ អ្នកទិញវា ក្នុងតំលៃ៥ដុល្លារ ហើយអ្នកយកវាមកទីនេះ និងលក់ក្នុងតម្លៃ ១០០ដុល្លារ តើនេះជាអ្វីដែលគេហៅថា ការការពារព្រៃឈើឬ? ហើយសម្រាប់ប្រទេសជិតខាងឥណ្ឌូនេស៊ី មិនត្រូវត្អូញត្អែរនៅពេលដែលមានអ័ព្ទពុល នៅក្នុងតំបន់នេះទេ ព្រោះអ្វីដែលប្រទេសម៉ាឡេស៊ី និងសិង្ហបុរីបានស្តីបន្ទោស វាគ្រាន់តែជាពាក្រសម្តីលើកទ្បើង តែពួកគេមិនដែលជួយរកដំណោះស្រាយ ឬវិធីសាស្រ្តអ្វីសោះឡើយ។ ពេលពួកគេទទួលបានខ្យល់បរិសុទ្ធ ពីកោះស៊ូម៉ាត្រា និងកាលីម៉ាន់តាន់របស់យើង ពួកគេមិនដែលអគុណប្រទេសខ្ញុំទេ ហេតុអ្វីបានជាខ្ញុំគួរសុំអភ័យទោសចំពោះពួកគេ?»។

សូមជំរាបថា ឥណ្ឌូនេស៊ីបានបង្កើតទីភ្នាក់ងារស្តារដីព្រៃទ្បើងវិញ បន្ទាប់ពីភ្លើងឆេះព្រៃយ៉ាងច្រើន កាលពីឆ្នាំមុន។ គោលដៅរបស់ទីភ្នាក់ងារនេះ គឺដើម្បីស្តារដីព្រៃពីរលានហិកតា នៃដីព្រៃរងការខូចខាត ហើយត្រូវការប្រាក់ យ៉ាងហោចណាស់ មួយពាន់លានដុល្លារ សម្រាប់ទ្រទ្រង់មូលនិធិនេះ ក្នុងរយៈពេលប្រាំឆ្នាំ៕