ស៊ីរី: លោក Mikhail Bogdanov អនុរដ្ឋមន្រ្តីការបរទេសរុស្ស៊ី បានថ្លែងថា រដ្ឋាភិបាលក្រុងមូស្គូ បានផ្តួចផ្តើមការទាក់ទងជាមួយពួកអ្នកតំណាងរបស់ក្រុមប្រធានាធិបតីជាប់ឆ្នោតសហរដ្ឋអាមេរិក លោក ដូណាល់ ត្រាំ ដើម្បីពិភាក្សាបញ្ហាប្រទេសស៊ីរី។ នេះបើយោងតាមសារព័ត៌មាន CNN ចេញផ្សាយនៅថ្ងៃទី៩ ខែធ្នូ ឆ្នាំ២០១៦។
លោក Mikhail និយាយទៀតថា «យើងសង្ឃឹមថា រដ្ឋបាលប្រធានាធិបតីអាមេរិកថ្មី ដែលនឹងចូលកាន់តំណែងនាពេលខាងមុខនេះ នឹងបានដឹងការពិតថា បើគ្មានភាគីរុស្ស៊ីទេ បញ្ហាស៊ីរីក៏មិនអាចដោះស្រាយបានទ្បើយ ហើយយើងប្រុងប្រៀបបើកការចរចាជាមួយគ្នា»។
យោងតាមសារព័ត៌CNN បានឲ្យដឹងថា អតីតរដ្ឋមន្រ្តីការបរទេសអាមេរិក លោក Henry Kissinger នឹងជួបជាមួយប្រធានាធិបតីជាប់ឆ្នោត លោក ត្រាំ នៅថ្ងៃនេះ ក្នុងទីក្រុងញូវយ៉ក។
សូមជំរាបថា ប្រធានាធិបតីរុស្ស៊ី បានទូរស័ព្ទអបអរសាទរប្រធានាធិបតីជាប់ឆ្នោតអាមេរិក លោក ត្រាំ កាលពីថ្ងៃចន្ទហើយបាននិយាយថា រុស្ស៊ីបានប្រុងប្រៀបខ្លួនជាស្រេច ដើម្បីធ្វើជាដៃគូសន្ទនាជាមួយអាមេរិក។ ប្រធានាធិបតីទាំង២ក៏បានពិភាក្សាពីការធ្វើការងារ ដើម្បីប្រឆាំងភេរវកម្ម និងដំណោះស្រាយវិបត្តិប្រទេសស៊ីរីផងដែរ នេះបើតាមសេចក្តីថ្លែងការណ៍របស់រដ្ឋាភិបាលវិមានក្រឹមឡាំង៕
មតិយោបល់