ចិន: រដ្ឋាភិបាលក្រុងប៉េកាំង កាលពីថ្ងៃចន្ទ បានឲ្យដឹងថា ខ្លួនមានការព្រួយបារម្ភជាខ្លាំង ក្រោយប្រធានាធិបតីជាប់ឆ្នោតអាមេរិកលោក Donald Trump បានលើកទ្បើងថា អាមេរិកគ្រាំទ្រគោលនយោបាយចិនតែមួយ ដរាបណារដ្ឋាភិបាលចិនផ្ដល់សម្បទានពាណិជ្ជកម្ម និងលក្ខខណ្ឌផ្សេងទៀត ជាមួយក្រុងវ៉ាស៊ីនតោន។ នេះបើយោងតាមសារព័ត៌មាន CNN ចេញផ្សាយនៅថ្ងៃទី១៣ ខែធ្នូ ឆ្នាំ២០១៦។
អ្នកនាំពាក្យក្រសួងការបរទេសចិន បាននិយាយថា គោលនយោបាយនេះ គឺជាមូលដ្ឋានគ្រឹះនៃទំនាក់ទំនងរវាងសហរដ្ឋអាមេរិក-ចិន និងបានជំរុញឲ្យរដ្ឋបាលរបស់លោក Trump ស្វែងយល់ឲ្យបានហ្មត់ចត់ចំពោះបញ្ហានេះ។
កាសែតរដ្ឋចិន Global Times បានចុះផ្សាយថា លោក Trump ខ្វះការពិចារណាដែលគិតថា លោកអាចប្រើប្រាស់គោលនយោបាយតៃវ៉ាន់នេះ ដើម្បីជះឥទ្ធិពលដល់ការចរចាសេដ្ឋកិច្ច ហើយថា លោក Trump ចាំបាច់ត្រូវរៀនដោះស្រាយបញ្ហាកិច្ចការបរទេសឲ្យបានសមរម្យ។
កាសែតនេះ ក៏បានបញ្ជាក់ផងដែរថា ប្រសិនបើលោក Trump គាំទ្រឯករាជ្យភាពរបស់តៃវ៉ាន់ ឬក៏គាំទ្រការលក់អាវុធដល់តៃវ៉ាន់ ប្រទេសចិន នឹងមិនមានហេតុផលណាមួយ ដើម្បីធ្វើជាដៃគូជាមួយរដ្ឋាភិបាលក្រុងវ៉ាស៊ីនតោន លើកិច្ចការអន្តរជាតិនោះទេ ហើយប្រទេសចិនអាចផ្ដល់ការគាំទ្រផ្នែកយោធា និងការគាំទ្រផ្សេងៗទៀតដល់គូរបដិបក្ខរបស់សហរដ្ឋអាមេរិក៕
សូមជំរាបថា នៅក្នុងឆ្នាំ១៩៧៩ សហរដ្ឋអាមេរិកបានទទួលស្គាល់រដ្ឋាភិបាលក្រុងប៉េកាំងថា ជារដ្ឋាភិបាលស្របច្បាប់តែមួយគត់របស់ប្រទេសចិន ដោយក្នុងនោះ បានទទួលស្គាល់គោលជំហរចិនតែមួយ ហើយតៃវ៉ាន់គឺជាផ្នែកមួយនៃប្រទេសចិន៕
មតិយោបល់