អាមេរិកៈ មហាសេដ្ឋីអចលនទ្រព្យលោក ដូណាល់ ត្រាំ បានស្បថចូលកាន់តំណែង ជាប្រធានាធិបតីទី៤៥ ផ្លូវការរបស់អាមេរិកហើយ កាលពីថ្ងៃទីសុក្រទី២០ ខែមករា បន្ទាប់ពីបានធ្វើសច្ចាប្រណិធាន សម្រាប់ប្រជាជាតិអាមេរិកជាលើកដំបូង ក្នុងសុន្ទរកថាបើករបស់លោក ទៅកាន់ប្រទេសមួយ និងក្នុងនាមមេដឹកនាំពិភពលោកមួយផងដែរ។ នេះបើយោងតាមរយៈសារព័ត៌មាន channel news asia ចេញផ្សាយនៅថ្ងៃទី ២១ ខែមករា ឆ្នាំ២០១៧។
ហ្វូងមនុស្សរាប់សែននាក់ បានឈរប្រមូលផ្តុំគ្នានៅ National Mall ក្នុងរដ្ឋធានីវ៉ាស៊ីនតោន ដើម្បីមើលការស្បថចូលកាន់តំណែង និងស្តាប់មហារសេដ្ឋីវ័យ ៧០ ឆ្នាំ ខាងគណបក្សសាធារណៈរូបនេះថ្លែងសុន្ទរកថា។
លោក ត្រាំ បានមានប្រសាសន៍ថា «ទស្សនវិស័យថ្មីមួយ នឹងគ្រប់គ្រងដែនដីយើងចាប់ពីថ្ងៃនេះតទៅ ហើយទស្សនវិស័យនោះ គឺផ្តោតលើផលប្រយោជន៍ពលរដ្ឋអាមេរិកមុនគេបង្អស់។ ខ្ញុំនឹងមិនធ្វើឲ្យអ្នកទាំងអស់គ្នាខកចិត្តនោះទេ»។
សូមជំរាបថា នៅក្នុងពិធីស្បថចូលកាន់តំណែងលោក ដូណាល់ ត្រាំ នេះ ក៏មានវត្តមានមន្ត្រីរដ្ឋបាលចាស់គ្រប់ជាន់ថ្នាក់រួមទាំង អតីតប្រធានាធិបតីជាច្រើនរូបចូលរួម ជាពិសេសលោក បារ៉ាក់ អូបាម៉ា និងភរិយា ដែលជាបុគ្គលដ៏សំខាន់ ក្នុងកម្មវិធីនេះ ដើម្បីធ្វើការផ្ទេរអំណាចជាផ្លូវការ នៅចំពោះមុខក្រសែភ្នែកជាតិ និងអន្តរជាតិ ៕
មតិយោបល់