ឥណ្ឌា: មន្ត្រីប៉ូលិសជាន់ខ្ពស់ម្នាក់ បានឲ្យដឹងនៅថ្ងៃអាទិត្យនេះថា យ៉ាងហោចណាស់មនុស្សជិត ១០ បានស្លាប់ និងជាង ៤០នាក់ទៀតរងរបួស ក្រោយគ្រោះអកុសលរថយន្តបើកធ្លាក់ជ្រោះ នៅផ្លូវមួយ ក្នុងរដ្ឋ Himachal Pradesh ភាគខាងជើងប្រទេសឥណ្ឌា កាលពីយប់ថ្ងៃសៅរ៍។ នេះបើយោងតាមរយ: សារព័ត៍មានចិនស៊ិនហួរ ចេញផ្សាយនៅថ្ងៃទី៨ ខែឧសភា ឆ្នាំ២០១៦។

ហេតុការណ៍នេះ បានកើតឡើង នៅពេលដែលរថយន្តក្រុងមួយ ដឹកអ្នកដំណើរចំនួន ៥៥នាក់ បានបើកធ្លាក់ចូលទៅក្នុងជ្រោះជ្រៅមួយ នៅក្បែរតំបន់ Jogindernagar ក្នុងស្រុកម៉ានឌី ចម្ងាយ ២០០ គីឡូម៉ែត្រពីរដ្ឋធានី Shimla បន្ទាប់ពីអ្នកបើកបរ មិនអាចគ្រប់គ្រង ការបញ្ជារថយន្តក្នុងល្បឿនលឿន នេះបើតាមការឲ្យដឹងពីមន្ត្រី។

ខណ:ពេលសាកសពចំនួន ៩ ត្រូវបានគេទាញចេញពីរថយន្ដ ចំណែកឯអ្នកដែលរងរបួសវិញ ត្រូវបានបញ្ជូនទៅកាន់មន្ទីរពេទ្យ ដែលនៅក្បែរនោះដោយអ្នកស្រុក ហើយតាមការប៉ាន់ប្រមាណរបស់ប៉ូលិស ចំនួនមនុស្សស្លាប់ អាចនឹងមានការកើនឡើង ដោយសារអ្នករងរបួសភាគច្រើន សុទ្ធសឹងធ្ងន់ធ្ងរ៕