រុស្ស៊ី និងតួកគីបានចេញសេចក្តីថ្លែងការរួមមូយថា ឃាតកម្មលើឯកអគ្គរដ្ឋទូតរុស្ស៊ីប្រចាំនៅប្រទេសតួកគី នឹងមិនប៉ះពាល់ដល់ទំនាក់ទំនងរវាងប្រទេសទាំងពីរនោះទេ។ នេះយោងតាមសារព័ត៌មាន CNN ចេញផ្សាយនៅថ្ងៃទី២១ ខែធ្នូ ឆ្នាំ២០១៦។
ប្រធានាធិបតីតួកគី លោក Recep Tayyip Erdogan បាននិយាយនៅក្នុងរដ្ឋធានីអ៊ីស្តង់ប៊ុល បន្ទាប់ពីមេដឹកនាំទាំងពីរនិយាយគ្នាតាមទូរស័ព្ទកាលពីថ្ងៃច័ន្ទថា លោកនឹងពង្រីកសហប្រតិបត្តិការរជាមួយនឹងរុស្ស៊ី ជាពិសេសទៅលើបញ្ហាក្នុងប្រទេសស៊ីរី ។
រដ្ឋមន្ត្រីនៃប្រទេសទាំងពីរបានដាក់កម្រងផ្កា កាលពីថ្ងៃអង្គារ នៅលើរូបថតរបស់លោកឯកអគ្គរដ្ឋទូត Andrei Karlov នៅក្នុងទីក្រុងមូស្គូ។ លោក Karlov ត្រូវបានប៉ូលិសមិនជាប់កាតព្វកិច្ចម្នាក់ បាញ់សម្លាប់កាលពីថ្ងៃចន្ទ ខណ:មានហេតុការណ៍បាតុកម្មមួយ ដែលមានជាប់ពាក់ព័ន្ធជាមួយនឹងប្រទេសរុស្ស៊ីនៅក្នុងប្រទេសស៊ីរី។
រដ្ឋមន្ត្រីការបរទេសតួកគី លោក Mevlut Cavusoglu កំពុងស្ថិតនៅក្នុងទីក្រុងមូស្គូ ជាមួយនឹងរដ្ឋមន្ត្រីការបរទេសអ៊ីរ៉ង់ដើម្បីពិភាក្សាអំពីវិបត្តិនៅក្នុងប្រទេសស៊ីរី។
សូមជំរាបថា សាកសពរបស់លោក Karlov ត្រូវបានបញ្ជូនទៅដល់ទីក្រុងមូស្គូហើយ កាលពីល្ងាចថ្ងៃអង្គារ ដោយភរិយារបស់លោកបានអមដំណើរជាមួយ៕
មតិយោបល់