(ញូដេលី)៖ ក្រុមល្ខោន អូប៉េរ៉ា ចំនួន ២៧នាក់បានស្លាប់ និង ១៣នាក់ផ្សេងទៀតរងរបួស បន្ទាប់ពី រថយន្តក្រុងដឹកពួកគេបានធ្លាក់ចូលទៅក្នុងជ្រោះនៅក្បែរផ្លូវធ្វើដំណើរនៃស្រុក Deogarh ស្ថិតនៅក្នុងរដ្ឋ Odhisa ភាគខាងកើតប្រទេសឥណ្ឌា។ នេះបើតាមការចេញផ្សាយ ដោយទីភ្នាក់ងារព័ត៌មានចិនស៊ិនហួ នៅព្រឹកថ្ងៃចន្ទ ទី១៨ ខែមេសា ឆ្នាំ២០១៦។

គ្រោះថ្នាក់ចរាចរណ៍ដ៏រន្ធត់នោះ បានកើតឡើងតាំងពីយប់ថ្ងៃអាទិត្យ ស្ថិតនៅចម្ងាយ ២៦៤ គីឡូម៉ែត្រនៃភាគពាយ័ព្យរបស់ទីក្រុង Bhubaneswar របស់រដ្ឋ Odhisa។ រថយន្តក្រុងខាងលើនេះបានដឹកក្រុមល្ខោន អូប៉េរ៉ា ចំនួន៤០នាក់។ ប៉ូលិសបានអះអាងថា ផ្លូវធ្វើដំណើរនោះ ទំនងជាខ្ពស់ខ្លាំងពេក ហើយរថយន្តក្រុងទំនងជាបានបាត់បងម្ចាស់ការទៀត ពេលចុះចំណោត ទើបបានបណ្តាលឲ្យធ្លាក់ចូល ទៅក្នុងជ្រោះជម្រៅជាង ៥០ម៉ែត្រនោះតែម្តង៕