ក្រិក: បើយោងតាមព័ត៌មានចុងក្រោយបំផុតពីអាជ្ញាធរក្រិកបានឲ្យដឹងថា សោកនាដកម្មសមុទ្រមួយ ដែលមានមនុស្ស ៤នាក់បានស្លាប់និង ៥នាក់ផ្សេងទៀតរងរបួស បន្ទាប់ពី​គ្រោះ​ថ្នាក់ទូកបុកគ្នា បានកើតឡើងចេញពីកោះក្រិក Aegina ក្នុងឈូងសមុទ្រ Saronic កាលពីថ្ងៃ​អង្គារ​ម្សិលមិញ។ នេះបើយោងតាមការចេញផ្សាយដោយសារព័ត៌មានចិនស៊ិនហួ នៅថ្ងៃទី១៧ សីហា ឆ្នាំ២០១៦។

កាណូតមួយគ្រឿងដែលមានប្រវែង៨ម៉ែត្រ បានបុកជាមួយទូកទេសចរណ៍មួយគ្រឿងផ្សេងទៀត នៅពេល​ដែលវាបានធ្វើដំណើរនាវាចរបត់ត្រឡប់មកវិញ។ ជាលទ្ធផលអ្នកដំណើរទាំងអស់​បានធ្លាក់ចូល​ទៅក្នុងសមុទ្រ ដោយមនុស្សមាន ៤នាក់ក្នុងចំណោមពួកគេបានស្លាប់បាត់បង់​ជីវិតនិងរងរបួស​ជាច្រើន​នាក់។

បើយោងតាមឆ្មាំសមុទ្រក្រិចអ្នកដំណើរ ២០នាក់ ត្រូវបានជួយសង្គ្រោះ​ហើយមានមនុស្ស ៥នាក់ក្នុង​ចំណោម​ពួកគេបានរងរបួសនិងបញ្ជូនទៅកាន់មន្ទីរពេទ្យនៅក្រុងអាតែន។

សូមបញ្ជាក់ថា ប្រតិបត្ដិការស្វែងរកនិងការជួយសង្គ្រោះបានបន្តដោយមានជំនួយពីឧទ្ធម្ភាគចក្រយោធា ដើម្បីកំណត់ទីតាំងអ្នកដំណើរបាត់ខ្លួនណាមួយនៃទូកដំណើរទស្សនកិច្ចនេះ។ កាលៈទេសៈនៃការបុក​នោះ​នៅតែមិនទាន់ច្បាស់៕