ភ្នំពេញ:រថយន្ត RAV4 L មួយគ្រឿងចតប្លុងចោលរយៈពេល៤ថ្ងៃទៅហើយ មិនឃើញម្ចាស់មកយក រាយការណ៍ប្រាប់សមត្ថកិច្ច មកពិនិត្យ និងយកទៅរក្សាទុកជាបណ្តោះអាសន្ន កាលពីព្រឹកថ្ងៃទី២៤ ខែមេសា ឆ្នាំ២០១៦ ស្ថិតនៅ ក្នុងបុរីជម្ពូវ័ន្ត ភូមិត្រពាំងព្រៃព្រីងជើង សង្កាត់ចោមចៅ ខណ្ឌពោធិ៍សែនជ័យ។

រថយន្តដែលសន្តិសុខប្រទះឃើញខាងលើ ម៉ាក RAV4 L ពណ៌ទឹកប្រាក់ ពាក់ស្លាកលេខ ភ្នំពេញ 2Z- 6510 ត្រូវបានចតប្លុងទុកចោលកាលពីវេលាម៉ោង០៤និង២០នាទី រសៀលថ្ងៃទី២០ ខែមេសា ឆ្នាំ២០១៦ ជាច្រើនថ្ងៃមកហើយ។

បើតាមសំដីសន្តិសុខបានឲ្យដឹងថា កាលពីរសៀលថ្ងៃទី២០ខែឆ្នាំដដែល រូបគាត់ឃើញ រថយន្តមួយគ្រឿងខាងលើនេះ មកចតនៅកន្លែងកើតហេតុ តែរូបគាត់មិនបានចាប់អារម្មណ៍នោះទេ ដោយចតទុកចោល ទាំងថ្ងៃទាំងយប់ គ្មានអ្នកណាចាប់អារម្មណ៍ឡើយ អស់រយៈពេល៤ថ្ងៃ នៅតែមិនឃើញម្ចាស់ មកយកវិញ ទោះជាមានសន្តិសុខ ដើរសាកសួរពលរដ្ឋជុំវិញ ក៏គ្មានអ្នកណាស្គាល់ មិនដឹងថាម្ចាស់ រវល់បែបណា ឬយ៉ាងម្តេចនោះទេ ទើបចតទុកចោល បែបនេះទៅវិញ លុះរហូតដល់ ព្រឹកថ្ងៃទី២៤ ខែមេសា ឆ្នាំ២០១៦ ទើប សម្រេចរាយការណ៍ទៅនគរបសលប៉ុស្តិ៍ចោមចៅ ដើម្បីឲ្យមកពិនិត្យ ជាក់ស្តែង និងរក្សាទុកជាបណ្តោះអាសន្ន៕