ថៃៈ នៅព្រឹកនៅអង្គារនេះ ពលរដ្ឋថៃជាច្រើននាក់ បាននាំគា្នពាក់អាវពណ៌ស៊ីជំម្ពូ ដែលពួកគេជឿថា ជាពណ៌មួយពាក់ទៅ អាចជួយបួងសួងសុំឲ្យព្រះរាជសុខភាពព្រះមហាក្សត្រ Bhumibol Adulyadej ព្រះជន្ន ៨៨ ព្រះវស្សា បានប្រសើរទ្បើង ខណៈដែលព្រះអង្គកំពុងសម្រាកព្យាបាលជំងឺ នៅក្នុងមន្ទីរពេទ្យទីក្រុងបាងកក។ នេះបើយោងតាមរយៈ សារព័ត៌មានចិនសិង្ហបុរី ចេញផ្សាយនៅថ្ងៃទី១១ ខែតុលា ឆ្នាំ២០១៦។

បើតាមខាងព្រះបរមរាជវាំង កាលពីថ្ងៃអាទិត្យ បានឲ្យដឹងថា ក្រុមគ្រូពេទ្យព្យាបាលជំងឺព្រះមហាក្សត្រ Bhumibol Adulyadej បានបញ្ជាក់ថា ព្រះអង្គកំពុងមានស្ថានភាពទន់ខ្សោយលើប្រព័ន្ធដកដង្ហើម ហើយស្ថានភាពសុខភាព ព្រះអង្គពេលនេះ ក្រុមគ្រូពេទ្យនៅពុំទាន់អាចបញ្ជាក់ បានទេថាយ៉ាងណានោះ ។

ព្រះអង្គ Bhumibol ជាព្រះមហាក្សត្រគ្រងរាជ្យយូរជាងគេបំផុតរបស់ពិភពលោក និងក៏ជាស្តេចទទួលបានការគោរពស្រឡាញ់ពីប្រជាពលរដ្ឋយ៉ាងច្រើនក្នុងប្រទេសផងដែរ។

គួរបញ្ជាក់ដែរថា រយៈពេលជាងពីរឆ្នាំចុងក្រោយនេះ គេសង្កេតឃើញថា ព្រះមហាក្សត្រថៃ បានយាងចូលមន្ទីរពេទ្យ ទីក្រុងបាងកក ជាញឹកញាប់ ដែលបណ្ដាលប្រជានុរាស្ត្រទូទាំងប្រទេស កំពុងមានការព្រួយបារម្មណ៍ជាខ្លាំង អំពីព្រះរាជសុខភាពរបស់ព្រះអង្គ៕