អូស្ត្រាលី: ឧទ្យានផ្កាថ្ម និង ជីវ:ចម្រុះប៉រប្រះទឹកនៅក្នុងប្រទេសអូស្ត្រាលី ដែលល្បីល្បាញនៅ ទូទាំងពិភពលោកនោះ កំពុងតែទទួលការគំរាមកំហែងយ៉ាងខ្លាំង តាមរយ:ការប្រែប្រួល អាកាសធាតុរបស់ផែនដី ដែលបង្កឡើងភាគច្រើន ដោយសារតែទង្វើបស់មនុស្ស។ នេះបើតាមការចេញផ្សាយ ដោយទីភ្នាក់ងារព័ត៌មានចិនស៊ិនហួ នៅព្រឹកថ្ងៃសុក្រ ទី២៩ ខែមេសា ឆ្នាំ២០១៦។

ការរកឃើញខាងលើនេះ គឺបានមកពីការសិក្សាដោយសកលវិទ្យាល័យ Melbourne ដែលបាន ឲ្យដឹងថា ពេលនេះសីតុណ្ហភាពភពផែនដី កាន់តែក្តៅ ដូច្នេះទឹកសមុទ្រក៏កើនឡើងកម្តៅគួរឲ្យ ភ័យខ្លាចដែរ។ គ្មានអ្វីត្រូវងឿងឆ្ងល់នោះទេ តំបន់ថ្មប៉រប្រះទឹក ដែលពោពេញដោយជីវ:ចម្រុះបាត សមុទ្រដ៏ល្បីល្បាញនោះ ក៏កំពុងប្រឈមមុខនឹងភាពអន្តរាយផងដែរ ព្រោះតែមិនអាចទ្រាំទ្រ នឹងទឹកសមុទ្រក៏ក្តៅខ្លាំង។

យ៉ាងណាក៏ដោយ ក្រុមអ្នកវិទ្យាសាស្ត្រនៃសកលវិទ្យាល័យ របស់អូស្ត្រាលីខាងលើនេះនៅតែបន្ត ការសិក្សាអំពីផលប៉ះពាល់នានាបន្ថែមទៀត ទៅលើឧទ្យានខាងលើនេះ ស្របពេលដែល ពិភពលោកទាំងមូល មិនមែនតែអូស្ត្រាលីម្នាក់ឯងនោះទេ ក៏កំពុងតែទទួលរងគ្រោះដូចគ្នា៕