ឥណ្ឌូនេស៊ី: ទីភ្នាក់ងារស្វែងរកនិងជួយសង្គ្រោះរបស់ឥណ្ឌូនេស៊ី កាលពីថ្ងៃអង្គារ បានឱ្យដឹងថាសាកសព ចំនួន៤ត្រូវបានរកឃើញពីគំនរបាក់បែកនៃយន្តហោះដឹកទំនិញមួយ ដែលបានបាត់ខ្លួន កាlពីថ្ងៃច័ន្ទ នៅតំបន់ភ្នំនៃខេត្ត Papua ប្រទេសឥណ្ឌូនេស៊ី។ នេះបើតាមរយៈ សារព័ត៌ចិន​ស៊ិនហួ ចេញថ្ងៃទី០១ ខែវិច្ឆិកា ឆ្នាំ២០១៦។

ប្រធានទីភ្នាក់ងារស្វែងរក និងសង្គ្រោះជាតិលោក Henry Bambang Soelistyoបានឱ្យដឹងនៅថ្ងៃអង្គារនេះថា បំណែកយន្តហោះនេះត្រូវបានគេរកឃើញនៅលើដី ដែលមានរយៈកម្ពស់ ១២.០០០ ហ្វីតប្រហែល (៣.៦៦០ ម៉ែត្រ) នៅតំបន់Jayawijaya ដែលមានមនុស្សបួននាក់ នៅលើយន្តហោះ ក្នុងនោះមានអ្នកបើកយន្តហោះទាំងពីរផងដែរ។

លោក Soelistyo បាននិយាយបន្តទៀតថា អាជ្ញាធរកំពុងធ្វើការដើម្បីកំណត់អត្តសញ្ញាណសាកសព និងខិតខំប្រឹងប្រែងស្វែងរកអ្នកបាត់ខ្លួនជាបន្តទៀត ទោះបីមានការរំខានដោយអាកាសធាតុមិនល្អក៏ដោយ។

សូមបញ្ជាក់ថា តំបន់ជាច្រើននៃខេត្ត Papua​ ភាគខាងកើតប្រទេសឥណ្ឌូនេស៊ី សម្បូរទៅដោយប្រជុំកោះ ដែលគ្របដណ្តប់ទៅដោយភ្នំខ្ពស់ និង​ព្រៃក្រាស់ៗ ​ដែលបង្កឲ្យយន្តហោះមួយចំនួន បានធ្លាក់នៅទីនោះ ហើយមិនត្រូវបានរកឃើញមកដល់​ពេល​បច្ចុប្បន្ន៕