មីយ៉ាន់ម៉ា: កិច្ចប្រជុំរដ្ឋមន្ត្រីអាស៊ាន នៅក្នុងទីក្រុង Yangon បានផ្ដោតសំខាន់ទៅលើបញ្ហា ដែលបានកើតឡើងនៅក្នុងរដ្ឋ Rakhine ប្រទេសមីយ៉ាន់ម៉ា។ នេះយោងតាមសារព័ត៌មានChannel News Asia ចេញផ្សាយនៅថ្ងៃទី២០ ខែធ្នូ ឆ្នាំ២០១៦។
ពាក់ព័ន្ធនឹងព័ត៌មានស្ដីពីវិបត្តិ ដែលកំពុងបន្តកើតឡើងនៅក្នុងរដ្ឋ Rakhine នឹងត្រូវផ្តល់ជូនដល់បណ្ដាប្រទេសសមាជិកអាស៊ានដទៃទៀត ដើម្បីសហការក្នុងជួយសម្របសម្រួល ដល់កិច្ចការដឹកជញ្ជូនជំនួយចូលទៅកាន់តំបន់ជម្លោះនោះ។ នេះបើតាមការបញ្ជាក់របស់មន្ត្រីនានា នៅក្រោយការបញ្ចប់កិច្ចប្រជុំ កាលថ្ងៃចន្ទនេះ។
បើយោងតាមសេចក្ដីប្រកាសរបស់កិច្ចប្រជុំនេះ លោក Anifah Aman រដ្ឋមន្ត្រីការបរទេសម៉ាឡេស៊ី បាននិយាយនៅក្នុងកិច្ចប្រជុំនេះថា «ខ្ញុំជឿថា នៅក្នុងស្មារតីរក្សាភាពរួបរួមតែមួយរបស់អាស៊ាន យើងត្រូវតែដោះស្រាយបញ្ហានេះទាំងអស់គ្នា»។
លោកបានបន្ថែមថា រដ្ឋាភិបាលមីយ៉ាន់ម៉ាត្រូវតែធ្វើឲ្យបានច្រើនជាងនេះ។ លោកក៏បានបញ្ជាក់បន្ថែមផងដែរថា ពួកជ្រុលនិយមក្រុមរដ្ឋឥស្លាមអាចទាញប្រយោជន៍ពីវិបត្តិនេះ ដោយបានស្នើឲ្យមានការបង្កើត «ក្រុមអ្នកជំនាញការឯករាជ្យ» មួយក្រុម ដើម្បីស៊ើបអង្កេតលើការចោទប្រកាន់អំពីការរំលោភធ្វើបាបនៅក្នុងរដ្ឋ Rakhine។
រដ្ឋាភិបាលរដ្ឋ Rakhine និងរដ្ឋាភិបាលមីយ៉ាន់ម៉ា បានបង្កើតគណ:កម្មាធិការស៊ើបអង្កេតមួយ ដើម្បីដោះស្រាយបញ្ហានេះ។ លោក Retno Marsudi រដ្ឋមន្ត្រីការបរទេសឥណ្ឌូនេស៊ី បានថ្លែងថា៖ «រដ្ឋមន្ត្រីការបរទេសទាំងអស់ ដែលបានចូលរួមនៅក្នុងកិច្ចប្រជុំនេះ បានផ្លាស់ប្ដូរយោបល់គ្នាដោយស្មារតីស្មោះត្រង់ទៅវិញទៅមក»។
ក្នុងនោះរដ្ឋមន្ត្រីការបរទេសដទៃទៀត ដែលបានចូលរួមនៅក្នុងកិច្ចប្រជុំនេះ ក៏បញ្ជាក់ដែរថា កិច្ចប្រជុំនេះ ជាកិច្ចប្រជុំប្រកបដោយផ្លែផ្កានិងអាចលើកឡើងក្នុងកិច្ចប្រជុំអាស៊ានលើកទី៣០ ក្នុងប្រទេសហ្វីលីពីន៕
មតិយោបល់