ម៉ាឡេស៊ី: ចំនួនជនរងគ្រោះដោយសារទឹកជំនន់ នៅឯកន្លែងមជ្ឈមណ្ឌលជម្លៀសចំនួន ៧០ ទីតាំង បានកើនឡើងដល់ ៨.២០៤ នាក់ ក្នុងចំណោម ២.៤២៧ គ្រួសារ។ នេះបើយោងតាមរយ: សារព័ត៌មាន Channel News Asia ចេញផ្សាយនៅថ្ងៃទី២៥ ខែមករា ឆ្នាំ២០១៧។

ប្រធានគណ:កម្មាធិការសុខាភិបាល និងបរិស្ថានរដ្ឋលោក Datuk Ayub Rahmat បាននិយាយថា ស្រុក Segamat បានទទួលរងផលប៉ះពាល់យ៉ាងខ្លាំងដល់មនុស្សចំនួន ៦.៦០៩ នាក់ (មកពី ២.០១២ គ្រួសារ) ត្រូវបានជម្លៀសខ្លួនចេញ ដែលបើធៀបនឹងកាលពីម្សិលមិញ គឺមានមនុស្ស ៤.៩២១ នាក់ (មកពី ១.៥១៨ គ្រួសារ) ។

នាយករដ្ឋមន្រ្តីលោក Najib Razak បាននិយាយនៅលើ Twitter ថា «រដ្ឋាភិបាលម៉ាឡេស៊ី នឹងពិនិត្យតាមដានយ៉ាងដិតដល់ អំពីបញ្ហាទឹកជំនន់នៅរដ្ឋ Johor និង Pahang» ។

មកទល់ពេលនេះ នៅតំបន់ប្រជុំជន Tangkak មនុស្សសរុបចំនួន ១៥៧ នាក់ ក្នុងចំណោម ៤១ គ្រួសារ ត្រូវបានសង្គ្រោះទៅទីតាំងមជ្ឈមណ្ឌល ៥ កន្លែង និងនៅទីក្រុង Johor Bahru មនុស្ស ៨៨ នាក់ (មកពី ២៤ គ្រួសារ) ត្រូវបានជម្លៀសទៅមជ្ឈមណ្ឌលសង្គ្រោះ ២ កន្លែង។

ក្នុងនោះដែរ លោក Ayub បានឲ្យដឹងថា នៅទីក្រុង Kota Tinggi ជនរងគ្រោះ ១.០០៣ នាក់ (មកពី ២៤៩ គ្រួសារ) ត្រូវបានគេជម្លៀសទៅមជ្ឈមណ្ឌលសង្គ្រោះចំនួន ៥ កន្លែង ខណ:ដែលមជ្ឈមណ្ឌល នៅស្រុក Kluang ៤ កន្លែងទៀត បានបើកដើម្បីផ្តល់នូវជម្រក សម្រាប់ជនរងគ្រោះដោយទឹកជំនន់ ១៣៥ នាក់ (មកពី ៣៥ គ្រួសារ)៕