ប៉ាគីស្ថាន: អាជ្ញាធរក្នុងប្រទេស នៅថ្ងៃអង្គារនេះ បានចាប់ឃុំខ្លួនលោក Hafiz Saeed ជា​មេដឹកនាំ​របស់​ក្រុម Jamaat-ud-Dawa (JuD) ដែល​ត្រូវបាន​ចោទប្រកាន់ថា នៅ​ពីក្រោយ​ការវាយប្រហារ​ នៅមជ្ឈមណ្ឌលពាណិជ្ជកម្ម ក្នុង​ទីក្រុងបុមបៃ កាលពី​ឆ្នាំ​២០០៨ ដែលបានសម្លាប់មនុស្ស ១៦៦ នាក់។ នេះបើយោងតាមរយ: សារព័ត៌មានចិនស៊ិនហួ ចេញផ្សាយនៅថ្ងៃទី៣១ ខែមករា ឆ្នាំ២០១៧។

តាមការអះអាងពីមន្រ្តីអាជ្ញាធរ បានឲ្យដឹងថា ក្រសួងមហាផ្ទៃបានចេញដីកាចាប់ខ្លួន លោក Hafiz Saeed កាលពីថ្ងៃច័ន្ទ បន្ទាប់ពីលោកបាននិយាយទៅកាន់ប្រព័ន្ធផ្សព្វផ្សាយ នៅទីក្រុង Lahore ហើយក្នុងនោះដែរ មន្ត្រីជាន់ខ្ពស់បួនរូបនៃក្រុមនេះ ក៏ត្រូវបានគេឃុំខ្លួនផងដែរ នៅតាមបណ្តាទីក្រុងផ្សេងៗគ្នា ក្នុងរដ្ឋ Punjab។

មន្ត្រីអ្នកនាំពាក្យរដ្ឋាភិបាល បាននិយាយថា វត្តមានប៉ូលិស ត្រូវបានដាក់ពង្រាយនៅឯទីស្នាក់ការកណ្តាល JuDs ក្នុងតំបន់ប្រជុំជន Muridke ជិតទីក្រុង Lahore ។

មុនប៉ុន្មានម៉ោងដែលលោក Saeed ត្រូវបានគេដាក់នៅក្រោមការឃុំខ្លួនក្នុងផ្ទះ រដ្ឋមន្រ្តីក្រសួងមហាផ្ទៃ លោក Chaudhry Nisar Ali Khan បាននិយាយថា ទីស្នាក់ការ JuD ក្នុងទីក្រុង Islamabad បានស្ថិតនៅក្រោមការអង្កេតរបស់គណ:កម្មាធិការទណ្ឌកម្មនៃក្រុមប្រឹក្សាសន្តិសុខអង្គការសហប្រជាជាតិ ចាប់តាំងពី ២០១០ ដល់ ២០១១ មកម្ល៉េះ ៕