ព័ត៌មានអន្តរជាតិ

ប្រធានសភាអង់គ្លេស នឹងមិនអនុញ្ញាតឲ្យលោក ត្រាំ ថ្លែងសុន្ទរកថា ក្នុងសភាខ្លួននោះទេ

អង់គ្លេស: ប្រធានសភាអង់គ្លេសលោក John Bercow បានជំទាស់យ៉ាងខ្លាំង ទៅនឹងប្រធានាធិបតីអាមេរិកលោក ដូណាល់ ត្រាំ ដែលចង់ថ្លែងសុន្ទរកថា នៅក្នុងសភា អំឡុងពេលដំណើរទស្សនកិច្ចផ្លូវរដ្ឋរបស់លោក មកកាន់ប្រទេសអង់គ្លេស។ នេះបើយោងតាមរយ: សារព័ត៌មាន BBC ចេញផ្សាយនៅថ្ងៃទី៧ ខែកុម្ភ: ឆ្នាំ២០១៧។

លោក Bercow បានប្រាប់សមាជិកសភាថា «ការប្រឆាំងទៅនឹងការរើសអើងជាតិសាសន៍ និងភេទ របស់លោក ត្រាំ គួរតែត្រូវបានពិចារណាឲ្យម៉ត់ចត់»។

ក្នុងនោះដែរ គណបក្សពលករ (Labour) និង គណបក្សជាតិស្កុតឡែន (SNP) ដែលជាមេដឹកនាំគាំទ្រក្រុមអ្នកបំបែកខ្លួនចេញពីអង់គ្លេស ដើម្បីប្រកាសឯករាជ្យនៅតំបន់ស្កុតឡែន បានសរសើរគាំទ្រទៅនឹងការលើកទ្បើងរបស់ប្រធានសភាផងដែរ ប៉ុន្តែក្រុមអ្នករិះគន់ បាននិយាយថា លោក Bercow គួរតែស្ថិតនៅអព្យាក្រឹតល្អជាង។

សូមជំរាបថា ប្រធានាធិបតីអាមេរិក លោក ដូណាល់ ត្រាំ ត្រូវបានអញ្ជើញឲ្យធ្វើដំណើរទស្សនកិច្ចផ្លូវរដ្ឋ ដោយនាយករដ្ឋមន្ត្រីអង់គ្លេសលោកស្រី Theresa May ក្រោយជំនួបប្រជុំនៅទីក្រុងវ៉ាស៊ីនតោន កាលពីខែមុន៕

មតិយោបល់