ហ្ស៊ីមបាវេ: អង្គភាពការពារស៊ីវិល (CPU) កាលពីថ្ងៃច័ន្ទ បានឲ្យដឹងថា យ៉ាងហោចណាស់មនុស្ស ១១៧ នាក់បានស្លាប់ ដោយសារភ្លៀងធ្លាក់ខ្លាំង នៅប៉ុន្មានខែចុងក្រោយនេះ ខណ:ដែល ១០៦ នាក់ផ្សេងទៀត រងរបួសដោយសាររន្ទះ។ នេះបើយោងតាមរយ: សារព័ត៌មានចិនស៊ិនហួ ចេញផ្សាយនៅថ្ងៃទី២៨ ខែកុម្ភ: ឆ្នាំ២០១៧។

ផ្ទះ និងខ្ទមនៅតាមជនបទជាង ១.៩៣០ ខ្នងរងការខូចខាតផងដែរ នៅទូទាំងប្រទេស ខណ:ដែល ៦៣៥ គ្រួសារ ត្រូវបានចាកចេញ ដោយគ្មានផ្ទះសម្បែង។

រហូតមកទល់ពេលនេះ សរុបសាលារៀនចំនួន ៧១ ខ្នង ស្ថាប័នសុខភាព ០៥ និងទំនប់វារីអគ្គិសនីចំនួន ៧១ កន្លែង បានទទួលរងការខូចខាត ស្របពេលដែលផ្លូវ និងស្ពានជាច្រើន ត្រូវបានទឹកកួចនាំយកទៅឆ្ងាយ ដោយសារតែមានភ្លៀងធ្លាក់ឥតឈប់ឈរ។

គួរញ្ជាក់ផងដែរថា ប្រទេសហ្ស៊ីមបាវេ បានទទួលភ្លៀងធ្លាក់យ៉ាងខ្លាំង ចាប់តាំងពីខែមករាកន្លងមក ជាលទ្ធផលនៅក្នុងទំនប់វារីអគ្គិសនីភាគច្រើនមានទឹកហូរហៀរ និងបានបង្កើនហានិភ័យគ្រោះទឹកជំនន់ នៅតំបន់ផ្នែកទាបៗ ក្នុងប្រទេសនេះ៕