អ៊ីរ៉ាក់: ចំនួនអ្នកស្លាប់ពីការវាយប្រហារគ្រាប់បែក ក្នុងរថយន្តនៅទីប្រជុំជន ក្នុងរដ្ឋធានីបាកដាដ ប្រទេសអ៊ីរ៉ាក់ បានកើនឡើងដល់ទៅ ៦៤នាក់បានស្លាប់ និង ៨៧នាក់ផ្សេងទៀតរងរបួស។ការផ្ទុះនេះបានបំផ្លាញតូបលក់ជាច្រើន និងរថយន្តជនស៊ីវិល និងបណ្ដាលឱ្យខូចខាតហាងនៅក្បែរនោះ និងអគារជាច្រើន។

នៅក្នុងរបាយការណ៍មុននេះបន្តិច បានឲ្យដឹងថា ចំនួនអ្នកស្លាប់សរុបចំនួន ៣៧នាក់បានស្លាប់ និង ៥៤នាក់ទៀតរងរបួស ដោយការបំផ្ទុះគ្រាប់បែករថយន្ត។

អ៊ីរ៉ាក់បច្ចុប្បន្នត្រូវបានទទួលរងរលកនៃអំពើហិង្សា ចាប់តាំងពីក្រុមរដ្ឋអ៊ិស្លាម (IS) បានកាន់កាប់ផ្នែកខ្លះនៃតំបន់ភាគខាងជើង និងភាគខាងលិចនៃប្រទេសអ៊ីរ៉ាក់ កាលពីខែមិថុនាឆ្នាំ២០១៤។

របាយការណ៍របស់បេសកកម្មជំនួយរបស់អង្គការសហប្រជាជាតិ សម្រាប់ប្រទេសអ៊ីរ៉ាក់ ហៅកាត់ថា (UNAMI) បានប៉ាន់ប្រមាណថា មានជនជាតិអ៊ីរ៉ាក់ ៧៤១នាក់បានស្លាប់ និង ១,៣៧៤នាក់ទៀតបានរងរបួស ក្នុងអំពើភេរវកម្មអំពើហិង្សា និងជម្លោះប្រដាប់អាវុធ នៅក្នុងខែមេសា នៅទូទាំងប្រទេសអ៊ីរ៉ាក់៕