អាមេរិកៈ ប្រធានាធិបតីអាមេរិកលោក ដូណាល់ ត្រាំ កាលពីថ្ងៃចន្ទ បានធ្វើការអំពាវនាវដ៏ចម្រូងចម្រាសមួយ ជាមួយនឹងការអះអាងថា រាល់អ្នកជួញដូរគ្រឿងញៀន នឹងត្រូវប្រឈមមុខការកាត់ទោសប្រហារជីវិត។ នេះបើយោងតាមសារព័ត៌មាន Channel News Asia ចេញផ្សាយនៅថ្ងៃទី២០ ខែមីនា​ ឆ្នាំ២០១៨។

ផែនការនេះ គឺជាផ្នែកមួយនៃគោលនយោបាយរបស់លោក ក្នុងការប្រយុទ្ធប្រឆាំងនឹងការរាតត្បាតថ្នាំ opioid ជាសារធាតុញៀនម្យ៉ាងដែលប្រើ ដើម្បីបំបាត់ការឈឺចាប់ សម្រាប់ពលរដ្ឋអាមេរិក។

ដោយមេដឹកនាំគណបក្សសាធារណរដ្ឋ បានលើកទ្បើងពីសំណើរនេះ នៅក្នុងអំឡុងពេលសុន្ទរកថាមួយ នៅទីក្រុង Manchester ជាកន្លែងមួយ ដែលរងការវាយប្រហារយ៉ាងធ្ងន់ធ្ងរ ដោយការ​ស្លាប់​បាត់បង់ជីវិត បន្ទាប់ពី​ការ​ប្រើប្រាស់​ថ្នាំ​ញៀន Opioid ហួស​កម្រិត។

លោក ត្រាំ បានថ្លែងប្រាប់មនុស្សម្នាលជាច្រើនថា «បញ្ហាទាំងនេះ គឺជាអ្វីដ៏គួរឲ្យភ័យខ្លាចបំផុត ហើយយើងត្រូវតែតឹងតែង ទៅលើអ្នកជួញដូរគ្រឿងញៀនទាំងនោះ។ ប្រសិនបើយើង មិនចាត់វិធានការខ្លាំងក្លា ទៅលើអ្នកចែកចាយថ្នាំញៀនទាំងនោះទេ គឺយើងកំពុងតែខ្ជះខ្ជាយពេលវេលារបស់យើងហើយ»។

ជាមួយគ្នានោះដែរ ប្រធានាធិបតី ត្រាំ បានបញ្ជាក់បន្ថែមថា វិធានការខ្លាំងក្លានោះ ក៏រួមមានទាំងទោសប្រហារជីវិតពួកគេផងដែរ។

សូមជំរាបថា ប្រជាជនអាមេរិកប្រមាណ ២.៤ លាននាក់ មានផ្ទុកនូវសារធាតុញៀន Opioid ដែលជាថ្នាំមួយប្រភេទ ត្រូវបានប្រើតាមវេជ្ជបញ្ជា ដើម្បីបំបាត់ការឈឺចាប់៕