UN: ក្រុមប្រឹក្សាសន្តិសុខអង្គការសហប្រជាជាតិ នៅថ្ងៃព្រហស្បតិ៍ បានថ្កោលទោសយ៉ាងខ្លាំង ចំពោះការបាញ់បង្ហោះកាំជ្រួចមីស៊ីលឆ្លងទ្វីប ដែលបានធ្វើឡើងដោយរដ្ឋាភិបាលកូរ៉េខាងជើង កាលពីថ្ងៃទី ២១ ខែមីនា រួមទាំងការធ្វើតេស្តម៉ាស៊ីនមីស៊ីលផ្លោង កាលពីថ្ងៃទី ១៩ ខែមីនាផងដែរ។ នេះបើយោងតាមរយៈ សារព័ត៌មានចិនស៊ិនហួ ចេញផ្សាយនៅថ្ងៃទី២៤ ខែមីនា ឆ្នាំ២០១៧។

តាមសេចក្តីប្រកាសពីក្រុមប្រឹក្សាសន្តិសុខ បានឲ្យដឹងថា «ការចាប់ផ្តើមដំណើរការ និងការធ្វើតេស្តម៉ាស៊ីននេះ គឺក្រុងព្យុងយ៉ាង បានរំលោភលើកាតព្វកិច្ចអន្តរជាតិរបស់ខ្លួន ដែលស្ថិតក្រោមសេចក្ដីសម្រេចរបស់ក្រុមប្រឹក្សាសន្តិសុខ អង្គការសហប្រជាជាតិលេខ ១៧១៨ (២០០៦), ១៨៧៤ (២០០៩), ២០៨៧ (២០១៣), ២០៩៤ (២០១៣), ២២៧០ (២០១៦) និង ២៣២១ (២០១៦) ។

សមាជិកនៃក្រុមប្រឹក្សាសន្តិសុខ មានការសោកស្ដាយយ៉ាងខ្លាំង ចំពោះសកម្មភាពមីស៊ីលផ្លោងទាំងអស់ របស់កូរ៉េខាងជើង ក្នុងនោះរួមមានទាំងការចាប់ផ្តើមដំណើរការ និងការធ្វើតេស្តម៉ាស៊ីននេះ ដោយលើកទ្បើងថា សកម្មភាព​របស់ក្រុងព្យុងយ៉ាង នឹងធ្វើឲ្យបង្កើនភាពតានតឹងក្នុងតំបន់ និងហានិភ័យនៃការប្រកួតប្រជែងអាវុធក្នុងតំបន់៕