អាមេរិក: ប្រធានាធិបតីលោក ដូណាល់ ត្រាំ នៅថ្ងៃព្រហស្បតិ៍ បានឲ្យដឹងថា អាមេរិកអាចនឹងធ្វើសង្គ្រាមជាមួយកូរ៉េខាងជើង ពាក់ព័ន្ធនឹងការប្រឈមមុខដាក់លើកម្មវិធីនុយក្លេអ៊ែរ និងមីស៊ីលរបស់របបមួយនេះ ប៉ុន្តែលោកចង់ធ្វើការដោះស្រាយបញ្ហាជម្លោះនេះ តាមរយ:ការទូតវិញ។ នេះបើយោងតាមរយ: សារព័ត៌មាន Channel News Asia ចេញផ្សាយនៅថ្ងៃទី២៨ ខែមេសា ឆ្នាំ២០១៧។

លោក ត្រាំ បានប្រាប់ភ្នាក់ងារ Reuters ក្នុងបទសម្ភាសការិយាល័យ Oval នៅមុនពេលគម្រប់១០០ ថ្ងៃ នៃការទ្បើងកាន់តំណែងរបស់លោក កាលពីថ្ងៃសៅរ៍ថា «ពិតណាស់ថា យើងមានឱកាស អាចបញ្ចប់ជម្លោះដ៏តានតឹងនេះ ជាមួយកូរ៉េខាងជើង»។ ក៏ប៉ុន្តែលោក ត្រាំ បាននិយាយថា ខ្លួនចង់ដោះស្រាយវិបត្តិនេះ ដោយសន្តិវិធី ជាផ្លូវមួយដែលលោក និងរដ្ឋបាលរបស់លោក បានសង្កត់ធ្ងន់ទៅលើការរៀបចំដំណើរផ្លាស់ប្តូរនៃការដាក់ទណ្ឌកម្មសេដ្ឋកិច្ចថ្មីមួយ ចំពោះកូរ៉េខាងជើង ជាជាងការប្រើកម្លាំងយោធា។

លោកបានថ្លែងថា «យើងចង់ដោះស្រាយរឿងនេះ តាមរយ:ការទូត ប៉ុន្តែវាគឺជាការលំបាកខ្លាំងណាស់ សម្រាប់យើង»។

ពាក់ព័ន្ធនឹងបញ្ហានេះដែរ ​មន្រ្តីជាន់ខ្ពស់​អាមេរិកជាច្រើន ​បានអះអាងថា​ ការប្រើកម្លាំងយោធា កំពុងជា​ជម្រើសមួយ សម្រាប់​ការពិចារណា បើទោះបីធអាមេរិកបានបញ្ជូននាវា​​ពិឃាតផ្ទុក​យន្តហោះ​ចម្បាំង USS Carl Vinson និងនាវាមុជទឹក USS Michigan ព្រមទាំងក្រុមកងកម្លាំងវាយប្រហារជើងទឹក ឆ្ពោះទៅកាន់​ឧបទ្វីបកូរ៉េ ក្នុងការកំញើញដាក់រដ្ឋាភិបាលក្រុងព្រុងយ៉ាងក៏ដោយ៕