អូស្ត្រាលី: បន្ទាប់ពីកិច្ចពិភាក្សានៅក្នុងទីក្រុងញូវយ៉ក រដ្ឋមន្រ្តីក្រសួងការបរទេសអូស្ត្រាលី លោកស្រី Julie Bishop នៅថ្ងៃសុក្រនេះ បានឲ្យដឹងថា មន្រ្តីជាន់ខ្ពស់របស់រដ្ឋបាលលោក ដូណាល់ ត្រាំ កំពុងភ័យខ្លាចអំពីការប្រកួតប្រជែងអាវុធនុយក្លេអ៊ែរ នៅតំបន់អាស៊ីប៉ាស៊ីហ្វិក ប្រសិនបើភាពតានតឹង ជាមួយកូរ៉េខាងជើង នៅតែបន្តកើនទ្បើង មិនអាចបញ្ឈប់បាននោះ។ នេះបើយោងតាមរយៈ សារព័ត៌មាន Channel News Asia ចេញផ្សាយនៅថ្ងៃទី២៦ ខែឧសភា ឆ្នាំ២០១៧។

នៅក្នុងឆ្នាំនេះ ក្រុងព្យុងយ៉ាង បានបើកការបាញ់បង្ហោះមីស៊ីលជាបន្តបន្ទាប់ ជាក់ស្ដែងមីស៊ីលផ្លោងរយៈចម្ងាយមធ្យម ឈ្មោះថា Hwasong-12 ត្រូវបានបាញ់សាកល្បងផងដែរ នៅក្នុងខែនេះ ដោយកូរ៉េខាងជើង បានអះអាងថា វាមានសមត្ថភាពដឹកក្បាលគ្រាប់នុយក្លេអ៊ែរធុនធ្ងន់មួយ ដែលសកម្មភាពនេះ បានជំរុញឲ្យមានភាពតានតឹង ជាមួយនឹងក្រុងវ៉ាស៊ីនតោន។

ពាក់ព័ន្ធនឹងទង្វើនេះដែរ ត្រូវបានគេចាត់ទុកថា ជាការធ្វើតេស្តគ្រាប់បរមាណូពីរលើកហើយ ចាប់តាំងពីចុងឆ្នាំមុន ដែលតម្រូវឲ្យមានវិធានការការពារ ដើម្បីប្រឆាំងនឹងការគំរាមកំហែងអាវុធនុយក្លេអ៊ែរនេះ។

មកទល់ពេលនេះ សហរដ្ឋអាមេរិកបានព្រួយបារម្ភថា ប្រសិនបើមេដឹកនាំកូរ៉េខាងជើង លោក គឹម ជុងអ៊ុន មិនព្រមបញ្ឈប់មហិច្ឆតាផលិតអាវុធប្រល័យលោកនោះ បណ្តាប្រទេសផ្សេងទៀតក្នុងតំបន់នេះ រួមទាំងប្រទេសជប៉ុន កូរ៉េខាងត្បូង នឹងត្រូវបង្ខំចិត្តដើម្បីបង្កើនសមត្ថភាព ផលិតអាវុធនុយក្លេអ៊ែរដោយផ្ទាល់ ជាវិធានការការពាររបស់ពួកគេផងដែរ៕