កាលពីពេលថ្មីៗនេះ ក្រុមហ៊ុន Vietjet Aviation Joint Stock បានចុះហត្ថលេខាជាមួយ CFM International ជាក្រុមហ៊ុនវិនិយោគរួមរវាង GE និង Safran លើកិច្ចព្រមព្រៀងផ្គត់ផ្គង់ម៉ាស៊ីនចំនួន ២១៥គ្រឿង ដើម្បីផ្តល់ថាមពលដល់យន្តហោះរបស់ក្រុមហ៊ុនខ្លួន ក្រោមអធិបតីភាពលោកនាយករដ្ឋមន្ត្រីប្រទេសវៀតណាមលោក Nguyen Xuan Phuc និងរដ្ឋមន្ត្រីពាណិជ្ជកម្មអាមេរិកលោក Wilbur L. Ross។ កិច្ចព្រមព្រៀងរយ:ពេល ១២ឆ្នាំ ដែលមានតម្លៃ ៣.៥៨ពាន់លានដុល្លារអាមេរិកនេះ រួមបញ្ចូលទាំងសេវាបច្ចេកទេស ម៉ាស៊ីន និងការថែទាំសមាសភាគម៉ាស៊ីន។
ថ្លែងនៅក្នុងពិធីចុះហត្ថលេខានេះ អ្នកស្រី Nguyen Thi Phuong Thao ជាប្រធាន និងជានាយកប្រតិបត្តិក្រុមហ៊ុន Vietjet បានឱ្យដឹងថា៖ «យើងកំពុងរៀបចំយន្តហោះរបស់យើងទៅជាក្រុមយន្តហោះ និងម៉ាស៊ីនដែលស៊ីប្រេងក្នុងកម្រិតសមរម្យ និងមិនប៉ះពាល់បរិស្ថាន។ ម៉ាស៊ីននៅក្រោមកិច្ចព្រមព្រៀងថ្ងៃនេះ នឹងជួយយើងសន្សំសំចៃការប្រើប្រាស់ប្រេងរហូតដល់ ១៥% ក៏ដូចជាទទួលបានសេវាកម្មជួសជុលផ្នែកបច្ចេកទេស ថែទាំ និងការបណ្តុះបណ្តាលនានា។ នេះជាកិត្តិយសរបស់យើងដែលបានសហការជាដៃគូជាមួយ GE and CFM International។ ដោយសារកិច្ចព្រមព្រៀងនេះ យន្តហោះរបស់ក្រុមហ៊ុន Vietjet នៅពេលនេះអាចរីករាយជាមួយបច្ចេកវិជ្ជាជឿនលឿន និងថ្មីៗដែលបានជួយបង្កើនគុណភាពហោះហើរ ទំនុកចិត្តលើប្រតិបត្តិការ និងកាត់បន្ថយថ្លៃចំណាយ។ យើងជឿជាក់យ៉ាងមុតមាំថាកិច្ចព្រមព្រៀងនេះនឹងជំរុញការអភិវឌ្ឍសេដ្ឋកិច្ច និងពាណិជ្ជកម្មរវាងប្រទេសទាំងពីរ ព្រមទាំងបង្កើតការងារជាច្រើនលានសម្រាប់ប្រជាជនទាំងពីរ។»
លោក Gaël Méheust ជាប្រធាន និងនាយកប្រតិបត្តនៃ CFM International បានថ្លែងថា «យើងពិតជាស្ញប់ស្ញែងយ៉ាងខ្លាំងដែលកិច្ចព្រមព្រៀងនេះបានបង្ហាញទំនុកចិត្តយ៉ាងខ្ពស់ជាមួយ CFM និងជាមួយសមត្ថភាពរបស់យើងក្នុងការទ្រទ្រង់ក្រុមហ៊ុន Vietjet ក្នុងរយ:ពេលវែង។» «វាពិតជាកិត្តិយសណាស់ដែលយើងបានក្លាយជាផ្នែកមួយនៃក្រុមការងារដ៏សង្វាតសម្រាប់រយ:ពេល ៦ ឆ្នាំចុងក្រោយនេះ។ ហើយយើងពិតជាមានសំណាងដែលបានដឹងថាសម្ព័ន្ធភាពដ៏ពិសេសនេះនឹងបន្តទៅជាច្រើនឆ្នាំខាងមុខទៀត។»
ក្នុងឱកាសនេះផងដែរ ក្រុមហ៊ុន Vietjet និង GECAS តំណាងដោយ GE បានចុះហត្ថលេខាលើអនុស្សរណ:យោគយល់ក្នុងការផ្តល់ហិរញ្ញប្បទានយន្តហោះដែលមានតម្លៃ ១ ពាន់លានដុល្លារ។ ដូច្នេះហើយ ក្រុមហ៊ុន GECAS នឹងធ្វើការទ្រទ្រង់ក្រុមហ៊ុន Vietjet លើផ្នែកហិរញ្ញវត្ថុ និង/ឬ ទិញ និងរៀបចំលក់កិច្ចព្រមព្រៀង Leaseback សម្រាប់ជួលយន្តហោះ ១០គ្រឿងដែលបញ្ជាទិញដោយក្រុមហ៊ុន Vietjet។
ក្រុមហ៊ុនអាកាសចរណ៍ Vietjet និងក្រុមហ៊ុន Honeywell Aviation បានយល់ព្រមចុះកិច្ចព្រមព្រៀងលើការផ្គត់ផ្គង់ថាមពលជំនួយ និងសេវាថែទាំផ្នែកបច្ចេកទេសដើម្បីដំណើរការយន្តហោះចំនួន ៩៨ គ្រឿង។ កិច្ចព្រមព្រៀងដែលមានតម្លៃ ១៨០លានដុល្លារនេះ ត្រូវបានធ្វើឡើងក្នុងគោលបំណងថែទាំយន្តហោះរបស់ក្រុមហ៊ុន Vietjet ឱ្យសមស្របតាមស្តង់ដារឈានមុខរបស់ពិភពលោក៕
មតិយោបល់