អាមេរិកៈ មន្ត្រីទីក្រុងវ៉ាស៊ីនតោន នៅថ្ងៃព្រហស្បតិ៍ បានឲ្យដឹងថា កូរ៉េខាងជើង បានធ្វើតេស្តសាកល្បងម៉ាស៊ីន បាញ់គ្រាប់រ៉ុក្កែតមួយផ្សេងទៀត ដែលអាមេរិកជឿជាក់ថា អាចជាផ្នែកមួយ នៃកម្មវិធីអភិវឌ្ឍមីស៊ីលផ្លោងអន្តរទ្វីប របស់របបមួយនេះ។ នេះបើយោងតាមសារព័ត៌មាន Channel News Asia ចេញផ្សាយនៅថ្ងៃទី២៣ ខែមិថុនា ឆ្នាំ២០១៧។

ប្រភពដដែរ បាននិយាយថា តាមរយៈតេស្តសាកល្បងចុងក្រោយនៃម៉ាស៊ីន និងមីស៊ីល ដែលបានធ្វើទ្បើងជាបន្តបន្ទាប់ ដោយក្រុងព្យុងយ៉ាងនៅក្នុងឆ្នាំនេះ សហរដ្ឋអាមេរិក អាចវាយតម្លៃបានថា វាជាដំណាក់កាលតូចមួយ នៃកម្មវិធីអភិវឌ្ឍមីស៊ីលផ្លោងអន្តរទ្វីប (ICBM )។

ពាក់ព័ន្ធនឹងបញ្ហានេះ មន្ត្រីទី ២ របស់អាមេរិក ក៏បានបញ្ជាក់ពីការធ្វើតេស្តនេះផងដែរ ប៉ុន្តែមិនបានផ្តល់ព័ត៌មានលម្អិតបន្ថែមទេ អំពីប្រភេទគ្រាប់រ៉ុកកែត ដែលត្រូវបានបាញ់សាកល្បង ឬថាតើវាសមនឹងចាត់ចូលទៅក្នុងកម្មវិធីអភិវឌ្ឍមីស៊ីលផ្លោងអន្តរទ្វីបដែរ ឬយ៉ាងណានោះទេ។

សូមជំរាបថា ការធ្វើតេស្តម៉ាស៊ីននេះ បានកើតឡើងមួយថ្ងៃបន្ទាប់ពីអាមេរិក បានប្រាប់ឲ្យប្រទេសចិន ដាក់សម្ពាធសេដ្ឋកិច្ច និងការទូតបន្ថែមទៀត ទៅលើកូរ៉េខាងជើង ដើម្បីជួយទប់ស្កាត់កម្មវិធីនុយក្លេអ៊ែរ និងមីស៊ីលរបស់ប្រទេសមួយនេះ ក្នុងអំឡុងពេលកិច្ចចរចាកម្រិតខ្ពស់មួយ នៅទីក្រុងវ៉ាស៊ីនតោន៕