អាមេរិក: ប្រធានាធិបតីលោក ដូណាល់ ត្រាំ នៅថ្ងៃព្រហស្បតិ៍ បាននិយាយថា លោកមិនបានថតសំឡេងការសន្ទនា ជាមួយលោក James Comey អតីតប្រធានការិយាល័យស៊ើបអង្កេតសហព័ន្ធ FBI ទ្បើយ ខណ:ដែលលោក Comey បានលើកទ្បើងថា លោក ត្រាំ បានជំរុញឲ្យខ្លួនបញ្ចប់ការស៊ើបអង្កេតលើករណីជ្រៀតជ្រែករបស់រុស្ស៊ី នៅក្នុងការបោះឆ្នោតប្រធានាធិបតីអាមេរិក កាលពីឆ្នាំមុន។ នេះបើយោងតាមសារព័ត៌មាន BBC ចេញផ្សាយនៅថ្ងៃទី២៣ ខែមិថុនា ឆ្នាំ២០១៧។
ថ្លែងនៅលើប្រព័ន្ធ Twitter ផ្ទាល់ខ្លួន លោកប្រធានាធិបតី ត្រាំ បានឲ្យដឹងថា ការសន្ទនាជាលក្ខណឯកជន ជាមួយលោក Comey នៅឯសេតវិមាន បន្ទាប់ពីលោកចូលកាន់ដំណែង កាលពីខែមករាកន្លងទៅ គឺលោកគ្រាន់តែសុំភាពស្មោះត្រង់ពីលោក Comey ជុំវិញការស៊ើបអង្កេតប៉ុណ្ណោះ ខណ:ដែលលោក Comey ក៏មិនបានធ្វើការសន្យាអ្វីដែរ។
គួរបញ្ជាក់ដែរថា នៅឯជំនួបមួយទៀត ជាមួយប្រធានាធិបតី កាលពីពាក់កណ្តាលខែកុម្ភ: លោក Comey បានប្រាប់គណ:កម្មការព្រឹទ្ធសភាថា លោក ត្រាំ បានប្រាប់លោកថា «ខ្លួនសង្ឃឹមថា លោក Comey នឹងបោះបង់ចោលការស៊ើបអង្កេតលើអតីតទីប្រឹក្សាសន្តិសុខជាតិ លោក Michael Flynn រួមទាំងទំនាក់ទំនងរបស់លោក ជាមួយឯកអគ្គរដ្ឋទូតរុស្ស៊ីប្រចាំនៅរដ្ឋធានីវ៉ាស៊ីនតោន៕
មតិយោបល់