វ៉េណេស៊ុយអេឡា: ក្រុមអ្នកគាំទ្ររដ្ឋាភិបាលប្រហែល ១០០ នាក់ បានចូលទៅក្នុងរដ្ឋសភា ដែលគ្រប់គ្រងដោយគណបក្សប្រឆាំង និងបានវាយដំអ្នកតាក់តែងច្បាប់ជាច្រើននាក់។ នេះបើយោងតាមសារព័ត៌មាន BBC ចេញផ្សាយនៅថ្ងៃទី០៦ ខែកក្កដា ឆ្នាំ២០១៧។

តាមសាក្សីបាននិយាយថា ការប្រឈមមុខដាក់គ្នានេះ បានកើតឡើងបន្ទាប់ពីសម័យប្រជុំសភា ដើម្បីកំណត់ទិវាឯករាជ្យរបស់ប្រទេស។

ពួកយោធាដែលយាមល្បាតនៅទីនោះ ត្រូវបានក្រុមអ្នកគាំទ្រលួចវាយឆ្មក់ដោយឈើ និងបំពង់ ដើម្បីអាចឆ្លងកាត់តាមច្រកចូលទៅកាន់រដ្ឋសភា ដែលទាក់ទងនឹងបញ្ហានេះ ខាងរដ្ឋាភិបាល បានប្ដេជ្ញាថា នឹងធ្វើការស៊ើបអង្កេត។

សូមជំរាបថា នៅមិនបានប៉ុន្មានម៉ោងផង មនុស្ស ៣៥០ នាក់ ត្រូវបានកងកម្លាំងឡោមព័ទ្ធ។

ប្រធាន​សំឡេង​ភាគច្រើន​សភា​មកពី​បក្សប្រឆាំង លោក Julio Borges បាននិយាយនៅលើបណ្តាញសង្គម Twitter ថា ក្នុងចំណោមអ្នកត្រូវទ្បោមព័ទ្ធទាំងនោះ គឺមានអ្នកសារព័ត៌មានចំនួន ១០៨ នាក់ ព្រមទាំងនិស្សិត និងអ្នកចូលមកមើលហេតុការណ៍នេះផងដែរ។

បើតាមសាក្សីបានប្រាប់ភ្នាក់ងារព័ត៌មានរ៉យទ័រថា មនុស្សមួយចំនួន ត្រូវបានគេអនុញ្ញាតឲ្យចេញពីទីនោះ។

នៅក្នុងហេតុការណ៍នេះដែរ មានសមាជិកសភា ០៥នាក់បានរងរបួស ត្រូវបានគេនាំយកទៅព្យាបាលនៅមន្ទីរពេទ្យ។

គួរបញ្ជាក់ដែរថា វេណេហ្ស៊ុយអេឡា ត្រូវបានរង្គោះរង្គើដោយការតវ៉ា ជាមួយនឹងហិង្សាជាញឹកញយ ក្នុងប៉ុន្មានខែថ្មីៗនេះ ខណ:ដែលប្រទេសមួយនេះ កំពុងស្ថិតនៅក្នុងវិបត្តិសេដ្ឋកិច្ច៕