ឥណ្ឌា: ក្រុមមន្ត្រីក្នុងប្រទេស នៅថ្ងៃច័ន្ទនេះ បាននិយាយថា យ៉ាងហោចណាស់មនុស្ស ២៣ នាក់បានស្លាប់ និងជាង ១២ នាក់ទៀតរងរបួស នៅក្នុងករណីរន្ទះបាញ់ និងព្យុះភ្លៀង នៅទូទាំងរដ្ឋប៊ីហារ ភាគខាងកើតប្រទេសឥណ្ឌា។ នេះបើយោងតាមសារព័ត៌មានចិនស៊ិន ចេញផ្សាយនៅថ្ងៃទី១០ ខែកក្កដា ឆ្នាំ២០១៧។

ចំនួនអ្នកស្លាប់ និងរបួសទាំងអស់ ត្រូវបានគេរាយការណ៍មកពីទីក្រុងវីសាលីយ៉ា, សារ៉ាន់ និងទីក្រុងប៉ាត់ណា ដែលជារដ្ឋធានីនៃរដ្ឋប៊ីហារ។

ពាក់នឹងបញ្ហានេះដែរ នាយកដ្ឋានឧតុនិយមនៅក្នុងរដ្ឋ ក៏បានជូនសេចក្ដីដំណឹងដាស់តឿនមួយផងដែរ សម្រាប់ប្រជាជនបន្ទាប់ពីមានព្យុះ និងភ្លៀងធ្លាក់យ៉ាងខ្លាំងរយ:ពេល ៤៨ ម៉ោង។

តាមការិយាល័យកត់ត្រាឧក្រិដ្ឋកម្មជាតិរបស់ឥណ្ឌា បានឲ្យដឹងថា យ៉ាងហោចណាស់មនុស្ស ២,០០០ នាក់បានស្លាប់ ដោយសាររន្ទះបាញ់ នៅឥណ្ឌាជារៀងរាល់ឆ្នាំ ចាប់តាំងពីឆ្នាំ ២០០៥ មក៕