ឥណ្ឌាៈ កងនាវាចម្បាំងអាមេរិកដឹកនាំដោយនាវាពិឃាត US Nimitz បានមកដល់ប្រទេសឥណ្ឌាហើយ ដើម្បី​ចូលរួម​សមយុទ្ធ​កងទ័ពជើងទឹក ​ជាមួយ​កង​នាវា​ជប៉ុន និង​ឥណ្ឌា ដែល​​ត្រូវបានគេឈ្មោះថា សមយុទ្ធ Malabar 2017។ នេះបើយោងតាមរយៈ សារព័ត៌មាន Sputnik ចេញផ្សាយនៅថ្ងៃទី១១ ខែកក្កដា ឆ្នាំ២០១៧។

មេបញ្ជាការកងទ័ពជើងទឹកអាមេរិក លោក Rear Adm. William Byrne បានប្រាប់អ្នកកាសែតថា សមយុទ្ធនេះ គឺ ជាការសារមួយផ្ញើទៅកាន់ប្រទេសចិន ដែលត្រូវបានគេមើលឃើញថា ជាការបញ្ឆេះកំហឹងដល់ទីក្រុងប៉េកាំង។

Malabar 2017 ជាសមយុទ្ធត្រីភាគី ដែលបានរៀបចំឡើង​ដោយ​កង​នាវា​ឥណ្ឌា ​នៅ​ទីក្រុង Chennai និង​ឈូង​សមុទ្រ Bengal​។​

កងនាវាចរអាមេរិក បានពន្យល់ថា សមយុទ្ធនេះ ជាផ្នែកហ្វឹកហ្វឺនរួមគ្នា ជាមួយសហរដ្ឋអាមេរិក ដែលបានចាប់ផ្តើមនៅក្នុងឆ្នាំ ១៩៩២ ដើម្បីដោះស្រាយការគំរាមកំហែងរួមគ្នា ចំពោះសន្តិសុខដែនសមុទ្រ នៅឥណ្ឌូអាស៊ី និងប៉ាស៊ីហ្វិក។

គួរបញ្ជាក់ដែរថា សមយុទ្ធ​យោធា​នេះ ធ្វើឡើង​ចំពេល​ផ្ទុះ​អំពើហិង្សា​​ជាថ្មី នៅឯ​តំបន់​ព្រំដែន​រវាង​ចិន និង​ឥណ្ឌា ខណៈដែលភាគីពាក់ព័ន្ធនឹងវា បានអះអាងថា ពួកគេ​មិនមាន​បំណង​អ្វី​ផ្សេង​ក្រៅតែពី​ការលើកកម្ពស់, ការស្វែងយល់​លើ​ការធ្វើ​ប្រតិបត្តិការ​រួមគ្នា និង​ចែករំលែក​បទពិសោធន៍​ឲ្យគ្នា​ប៉ុណ្ណោះ​៕