ចិន: គ្រោះទឹកជំនន់ដែលបណ្តាលមកពីទឹកភ្លៀងខ្លាំង បានបង្កឲ្យទឹកទន្លេកើនឡើង ដែលធ្វើឲ្យមនុស្សជាង ៨ ម៉ឺននាក់ រងផលប៉ះពាល់នៅក្នុងតំបន់ស្វយ័តក្វាងស៊ីចុង ភាគខាងត្បូងប្រទេសចិន។ នេះបើយោងតាមសារព័ត៌មានចិនស៊ិនហួ ចេញផ្សាយនៅថ្ងៃទី១៣ ខែកក្កដា ឆ្នាំ២០១៧។

យោងតាមការិយាល័យធនធានទឹក និងឧតុនិយមក្នុងតំបន់ បានឲ្យដឹងថា ទន្លេចំនួន ២០ នៅក្នុងតំបន់នេះ បានកើនឡើងការព្រមានកម្រិតខ្ពស់នៃទឹកជំនន់ ។

ប្រភពដដែរ បានបញ្ជាក់ថា ព្យុះភ្លៀងបានវាយប្រហារស្រុក ២៥ នៅក្នុងតំបន់ក្វាងស៊ីចុង ចាប់តាំងពីថ្ងៃច័ន្ទសប្ដាហ៍នេះ។ គិតត្រឹមវេលាម៉ោង ០៥ ល្ងាចថ្ងៃពុធ មនុស្ស ០២នាក់ ត្រូវបានស្លាប់ ខណ:ដែល ៨៣.៦០០ នាក់ បានរងផលប៉ះពាល់ដោយសារទឹកជំនន់។

នាយកដ្ឋានកិច្ចការស៊ីវិលក្នុងតំបន់ បាននិយាយថា អ្នកស្រុកសរុបចំនួន ១.៨៣២ នាក់ ត្រូវបានជម្លៀសចេញផងដែរ។

គួរបញ្ជាក់ដែរថា ទឹកជំនន់នេះ ក៏បានបំផ្លាញដំណាំស្បៀងអាហារចំនួន ៣.៨៧០ ហិកតាផងដែរ ថែមទាំងបានបណ្តាលឲ្យផ្ទះ ១៩៨ ខ្នង ដួលរលំ ហើយបើគិតជាទឹកប្រាក់នៃការបាត់បង់ផ្នែកសេដ្ឋកិច្ច គឺមានចំនួន ៤,១៧ លានដុល្លារអាមេរិក៕