អាមេរិក: តាមការសាកសួរពីអ្នកបើកបរយន្ដហោះឈ្លបការណ៍អាមេរិក ០៣ នាក់ បានឲ្យដឹងថា ការហោះទ្បើង និងចុះចតរបស់យន្ដហោះ នៅលើនាវាដឹកយន្តហោះចម្បាំង គឺមិនងាយស្រួលនោះទេ។ នេះបើយោងតាមសារព័ត៌មាន Spunitk ចេញផ្សាយនៅថ្ងៃ១៩ ខែកក្កដា ឆ្នាំ២០១៧។

យន្ដហោះ អាចនឹងត្រូវធ្លាក់នៅពេលហោះទ្បើងទៅលើអាកាស ឬមកដល់លើនាវាដឹកយន្តហោះ ដោយហេតុនេះហើយ ទើបអាកាសយានិក គឺចាំបាច់ត្រូវតែមានបទពិសោធន៍ និងការហ្វឹកហាត់ អស់រយ:ពេលជាច្រើនឆ្នាំ។ ជាក់ស្ដែងបេសកកម្ម នាពេលថ្មីៗនេះ នៅលើនាវា USS Dwight D. Eisenhower អាកាសយានិកម្នាក់ បានបង្ហាញពីការចុះចតនៃយន្តហោះឈ្លបការណ៍ E-2C Hawkeye លើនាវាពិតជាមិនងាយស្រួលនោះទេ។

ប្រសិនបើអ្នកបើកយន្ដហោះ គ្រប់គ្រងប្រព័ន្ធបញ្ជានៅខាងក្នុងវាបានល្អ នោះនឹងធ្វើឲ្យការហោះទ្បើង និងចុះចតប្រកបដោយសុវត្ថិភាព ប៉ុន្តែបើភ្លាត់ ឬខុសបច្ចេកទេសតែបន្តិចនោះ ប្រព័ន្ធបញ្ជានឹងលែងអាចគ្រប់គ្រងបាន ជាហេតុបង្កគ្រោះថ្នាក់គ្រប់ពេលវេលាទាំងអស់ ដោយយន្តហោះ ត្រូវប្រឈមនឹងការធ្លាក់ចូលទៅក្នុងទឹកសមុទ្រតែម្ដង៕