អារ៉ាប់រួមៈ អគ្គិភ័យដ៏ធំមួយ បានឆាប់ឆេះនៅអគារខ្ពស់មួយ ក្នុងទីក្រុងឌូបៃរបស់សហព័ន្ធ​អារ៉ាប់រួម ដែលហេតុការណ៍នេះ ត្រូវគេចាត់ទុកថា ជាលើកទី០២ ហើយ ក្នុងរយៈពេលពីរឆ្នាំកន្លងមកនេះ។ នេះបើយោងតាមសារព័ត៌មាន BBC ចេញផ្សាយនៅថ្ងៃទី ០៤ ខែសីហា ឆ្នាំ២០១៧។

អគារ Torch Tower មានកម្ពស់ ៣៥២ ម៉ែត្រ និង ៨២ ជាន់ ស្ថិតក្នុងចំណោមអគារដ៏ខ្ពស់ជាងគេបំផុត ក្នុងពិភពលោក ត្រូវបានអគ្គិភ័យឆាបឆេះយ៉ាងសន្ធោសន្ធៅ កាលពីយប់ថ្ងៃព្រហស្បតិ៍ ប៉ុន្តែពាក់ព័ន្ធនឹងមូលហេតុដែលបង្កមានភ្លើងឆេះនោះ គឺមិនទាន់ដឹងច្បាស់នៅទ្បើយទេ។

តាមអាជ្ញាធរ បាននិយាយថា នៅក្នុងហេតុការណ៍នេះ ពួកគេបានជម្លៀសមនុស្សចេញពីអគារដោយជោគជ័យ ហើយក្រុមពន្លត់អគ្គិភ័យ ក៏អាចគ្រប់គ្រងស្ថានការណ៍បានទាំងស្រុងផងដែរ។

ការិយាល័យរដ្ឋាភិបាលនៅទីក្រុងឌូបៃ បាននិយាយថា មកទល់ពេលនេះ មិនមានសេចក្ដីរាយការណ៍អំពីអ្នករងរបួស នៅក្នុងឧបទ្ទវហេតុនេះទេ ៕