រុស្ស៊ីៈ ​មន្ត្រី​ព័ត៌មាន​តំបន់​យោធា​ភូមិភាគ​ខាងកើត លោក Vladimir Matveyev នៅថ្ងៃពុធនេះ បានឲ្យដឹងថា បន្ទាប់ពីសមយុទ្ធយោធារួមគ្នាលើកដំបូងរវាងមហាយក្សទាំងពីរ នៅសមុទ្របាល់ទិករួមមក ខណៈនេះដែរប្រទេសរុស្ស៊ី និងចិន បានព្រមព្រៀងគ្នាបន្តធ្វើសមយុទ្ធជាលើកទីពីរ ក្នុងទីក្រុងវ្ល៉ាឌីវ៉ូស្តុក នាខែកញ្ញាខាងមុខ។ នេះបើយោងតាមសារព័ត៌ Spunitk ចេញផ្សាយនៅថ្ងៃទី០៩ ខែសីហា ឆ្នាំ២០១៧។

ថ្លែងនៅក្នុងសន្និសីទមួយ លោក Matveyev បាន​បញ្ជាក់ថា ភាគីទាំងពីរ បានព្រមព្រៀងធ្វើសមយុទ្ធកងទ័ពជើងទឹករួមគ្នា ចាប់ពីថ្ងៃទី ១៨ ដល់ ២៦ ខែកញ្ញា ឆ្នាំ ២០១៧ នៅទីក្រុងវ្ល៉ាឌីវ៉ូស្តុក ភាគខាងកើតប្រទេសរុស្ស៊ី។

សូមជំរាបថា សមយុទ្ធយោធារួមគ្នារវាងប្រទេសទាំងពីរ ជាលើកដំបូង ឈ្មោះថា Joint Sea-2017 បានប្រារព្ធធ្វើឡើងនៅថ្ងៃទី ២១ ដល់ថ្ងៃទី ២៨ ខែកក្កដា នៅសមុទ្របាល់ទិក។

តាមក្រសួងការពារជាតិរុស្ស៊ី បាននិយាយថា សមយុទ្ធលើកទីពីរនេះ ក្នុងគោលបំណងពង្រឹងសមត្ថភាពកងទ័ពជើងទឹក រុស្ស៊ី និងចិន ដើម្បីប្រឆាំងនឹងការគំរាមកំហែងនានានៅដែនទឹក រួមទាំងការបង្កើនកិច្ចសហប្រតិបត្តិការ រវាងកងទ័ពជើងទឹករបស់ប្រទេសទាំងពីរផងដែរ៕