គុយបា: តាមអាជ្ញាធរ បាននិយាយកាលពីថ្ងៃព្រហស្បតិ៍ថា មនុស្សប្រហែល ៧០ ម៉ឺននាក់ ត្រូវបានគេជម្លៀសចេញពីឆ្នេរសមុទ្រ ភាគឦសានប្រទេសគុយបា ខណ:ព្យុះ Irma ឆ្ពោះមកកាន់ភាគខាងលិច ឆ្លងកាត់តំបន់ការាបៀន។ នេះបើយោងតាមសារព័ត៌មានចិនស៊ិនហួ ចេញផ្សាយនៅថ្ងៃទី០៨ ខែកញ្ញា ឆ្នាំ២០១៧។

វាជាព្យុះទីហ្វុងប្រភេទទី៥ ត្រូវបានគេរំពឹងថា នឹងត្រូវឆ្លងកាត់កោះ Hispaniola របស់ប្រទេសហៃទី, សាធារណរដ្ឋដូមីនិក, កោះ Turks និង Caicos ។

តាមសេចក្ដីថ្លែងការណ៍ពីភ្នាក់ងារឧតុនិយមនៃប្រទេសគុយបា បាននិយាយថា ចំណុចកណ្ដាលនៃព្យុះនេះ នឹងត្រូវផ្លាស់ប្តូរគោលដៅរបស់វា មកកាន់ចន្លោះឆ្នេរសមុទ្រ ភាគខាងជើងប្រទេសគុយបា និងបាហាម៉ា។

ព្យុះ Irma មានល្បឿនវាយប្រហារអតិបរិមា ២៨០ គីទ្បូម៉ែតក្នុងមួយម៉ោង ដោយមានអនុភាពខ្យល់កួចខ្ពស់ ដែលវាអាចក្លាយជាព្យុះស៊ីក្លូនត្រូពិចដ៏មានសក្តានុពល។

សេចក្ដីថ្លែងការណ៍ដដែរ បានបញ្ជាក់ទៀតថា នឹងមានភ្លៀងធ្លាក់នៅខេត្តភាគខាងកើតប្រទេសគុយបា ព្រមទាំងហូហ្គិននៅយប់ថ្ងៃព្រហស្បតិ៍ រួមជាមួយខ្យល់ព្យុះ និងព្យុះត្រូពិច ដែលអាចកើនទ្បើងកម្ពស់ទឹកពី ៦ ទៅ ៨ ម៉ែត្រឯណ្ណោះ៕