ម៉ាឡេស៊ីៈ ក្រុមមន្ត្រីក្នុងប្រទេស បាននិយាយថា យ៉ាងហោចណាស់មនុស្ស ២៥ នាក់ ដែលភាគច្រើនគឺជាសិស្ស ត្រូវបានស្លាប់ បន្ទាប់ពីអគ្គីភ័យឆាបឆេះ នៅឯសាលាមួយកន្លែង ក្នុងទីក្រុងគួឡាឡាំពួ នៃ​ប្រទេសម៉ាឡេស៊ី។ នេះបើយោងតាមសារព័ត៌មាន Channel News Asia ចេញផ្សាយនៅថ្ងៃទី១៤ ខែកញ្ញា ឆ្នាំ២០១៧។

លោក Khirudin Drahman ប្រធាននាយកដ្ឋានពន្លត់អគ្គីភ័យ និងជួយសង្គ្រោះនៅទីក្រុងគួឡាឡាំពួ បានប្រាប់ភ្នាក់ងារ AFP ថា «ចំនួនអ្នកស្លាប់ទាំងនោះ រួមមានសិស្សសាលា ២៣ នាក់ និងអ្នកយាមពីរនាក់ ដែលឧបទ្ទវហេតុនេះ បានកើតទ្បើងនៅវេលាម៉ោង ០៥ និង ១៥ ព្រឹក (ម៉ោងនៅក្នុងស្រុក) ហើយមកទល់ពេលនេះ គេនៅមិនទាន់​ដឹងនៅទ្បើយទេ អំពីមូលហេតុដែលបង្កឲ្យមានគ្រោះអគ្គីភ័យ​នេះ»។

ពាក់ព័ន្ធនឹងបញ្ហានេះដែរ ក្រុមពន្លត់អគ្គីភ័យ​ក្នុង​ទីក្រុង ​បានបង្ហាញនូវក្តីព្រួយបារម្ភទៅលើប្រព័ន្ធសុវត្ថិភាព នៃសាលារៀន​សាសនាឯកជនជាច្រើនដទៃទៀត​ នៅទូទាំងប្រទេសផងដែរ៕