ហ្វីលីពីន: ប្រធានាធិបតីហ្វីលីពីនលោក Rodrigo Duterte បានទទួលការដឹកជញ្ជូនគ្រឿងសព្វាវុធ និងគ្រាប់កាំភ្លើងដែលផលិតនៅប្រទេសរុស្ស៊ី ដោយផ្ទាល់ជាច្រើន ខណ:ដែលលោកបានធ្វើដំណើរទៅកាន់នាវាពិឃាដ ប្រឆាំងនាវាមុជទឹក ឈ្មោះថា Admiral Panteleyev របស់​កង​នាវា​រុស្ស៊ី Pacific Fleet ដែលបច្ចុប្បន្ន កំពុងស្ថិតនៅកំពង់ផែទីក្រុងម៉ានីល។ នេះបើយោងតាមសារព័ត៌មាន RT ចេញផ្សាយនៅថ្ងៃទី២៦ ខែតុលា ឆ្នាំ២០១៧។

លោក Duterte បានត្រួតពិនិត្យមើលការផ្ទេរអាវុធ ពីសំណាក់ក្រុមហ៊ុនរុស្ស៊ី Kalashnikov មកកាន់ប្រទេសខ្លួន ដោយមានកាំភ្លើងប្រមាណ ៥០០០ដើម និងគ្រាប់រំសេវប្រហែលមួយលានគ្រាប់ ដែលត្រូវបានផ្ដល់ដោយរុស្ស៊ី ជាផ្នែកមួយនៃទំនាក់ទំនងថ្មីរវាងក្រុងម៉ូស្គូ និងម៉ានីល។

ក្រៅពីអាវុធ នាវាពិឃាដប្រឆាំងនាវាមុជទឹក របស់​កង​នាវា Pacific Fleet ក៏បានដឹកជញ្ជូនរថយន្តយោធាចំនួន ២០ គ្រឿងផងដែរ សម្រាប់កងកម្លាំងប្រដាប់អាវុធហ្វីលីពីន (AFP)៕