អាមេរិក: តាមរយ:សង្គ្រាមវាយប្រហារពាក្យសម្ដី និងការប្រមាថពីសំណាក់ប្រធានាធិបតីអាមេរិក លោក ដូណាល់ ត្រាំ ទៅលើមេដឹកនាំកំពូលកូរ៉េខាងជើង លោក គីម ជុងអ៊ុន ថា ជាបុរសក្បាលរឹងនោះ បានធ្វើឲ្យក្រុងព្យុងយ៉ាង បដិសេធមិនចូលតុចរចា ជាមួយអាមេរិកទ្បើយ។ នេះបើយោងតាមសារព័ត៌មាន Sputnik ចេញផ្សាយនៅថ្ងៃទី២៦ ខែតុលា ឆ្នាំ២០១៧។

មន្ត្រីរដ្ឋាភិបាល និងមន្រ្តីសភាអាមេរិកជាច្រើននាក់ បានប្រាប់ភ្នាក់ងារ NBC ថា ពួកគេត្រូវបានព្រមានពីឯក​អគ្គ​រដ្ឋទូត​អាមេរិកលោក Joseph Yun មិនឲ្យទៅកាន់កូរ៉េខាងជើងទ្បើយ ដោយលោកបានលើកទ្បើងថា ការប្រមាថរបស់លោក ត្រាំ នឹងមិនអាចជួយឲ្យពួកគេនាំក្រុមមន្ត្រីក្រុងព្យុងយ៉ាង ទៅកាន់តុចរចាបាននោះទេ។

ការថ្លែងរបស់លោក Yun បានធ្វើទ្បើងបន្ទាប់ពីសមាជិកព្រឹទ្ធសភា លោក Bob Corker និងប្រធានគណ:កម្មាធិការកិច្ចការបរទេសព្រឹទ្ធសភា និយាយថា សេតវិមានបានរារាំងកិច្ចប្រឹងប្រែងការទូត ជាមួយកូរ៉េខាងជើង ដោយលោក Yun បានបន្ថែមថា មានតែការចាប់ផ្តើមបញ្ចុះបញ្ចូលរដ្ឋបាលខ្លួន ឲ្យបញ្ឈប់ការគំរាមកំហែងបន្ថែមទៀត ទៅលើកូរ៉េខាងជើងប៉ុណ្ណោះ ទើបអាចធ្វើឲ្យមានកិច្ចចរចាឡើងវិញ ជាមួយរដ្ឋបាលលោក គីម ជុងអ៊ុន។

សូមជំរាបថា តាមរយ:របាយការណ៍ខាងលើនេះ គឺវាផ្ទុយទៅនឹងការអះអាងពីមុនរបស់លោក Rex Tillerson រដ្ឋមន្ត្រីការបរទេសអាមេរិក ដែលបានលើកឡើងកាលពីថ្ងៃទី១ ខែតុលាថា អាមេរិកកំពុងទាក់ទង ដោយផ្ទាល់ជាមួយរដ្ឋាភិបាលកូរ៉េខាងជើង៕