វៀតណាមៈ គណៈកម្មាធិការនៃមជ្ឈមណ្ឌលទប់ស្កាត់ និងគ្រប់គ្រងគ្រោះមហន្តរាយ នៅថ្ងៃចន្ទនេះ បានឲ្យដឹងថា ព្យុះទីហ្វុងដ៏កំណាចមួយ ឈ្មោះថា Damrey បានវាយប្រហារនៅភាគកណ្តាលប្រទេសវៀតណាម កាលពីល្ងាចថ្ងៃអាទិត្យ បានសម្លាប់មនុស្ស ២៩ នាក់ ខណៈដែល ២៩ នាក់ទៀត កំពុងបាត់ខ្លួន។ នេះបើយោងតាមសារព័ត៌មានចិនស៊ិនហួ ចេញផ្សាយនៅថ្ងៃទី៦ ខែវិច្ឆិកា ឆ្នាំ២០១៧។

ព្យុះទីហ្វុងនេះ បានបោកបក់ពន្លិចកប៉ាល់ដឹកទំនិញ កប៉ាល់នេសាទត្រី និងទូកជិត ២៣០ គ្រឿង ព្រមទាំងបានបំផ្លាញផ្ទះជាង ១,០០០ ខ្នងជាបន្តបន្ទាប់ នៅភាគកណ្តាលខេត្តខាញ់ហ័រ ខណៈដែលផ្ទះជាង ៤៣,០០០ ខ្នងទៀត ត្រូវបានប៉ើងដំបូល និងរងការខូចខាត ថែមទាំងបណ្តាលឲ្យមានការដាច់ភ្លើង នៅតាមបណ្ដាតំបន់ភាគកណ្តាល និងខ្ពង់រាបកណ្តាល ក្នុងខេត្តជាច្រើនទៀតផង។

រដ្ឋមន្ត្រីក្រសួងកសិកម្ម និងអភិវឌ្ឍន៍ជនបទវៀតណាម លោក Nguyen Xuan Cuong បាននិយាយពីថ្ងៃអាទិត្យថា «មកទល់ពេលនេះ ប្រទេសវៀតណាម កំពុងប្រឈមមុខនឹងព្យុះទីហ្វុងដ៏អាក្រក់បំផុត ដោយសារតែកម្រិតទឹកក្នុងស្ទឹងជាច្រើន នៅតំបន់ខ្ពង់រាបកណ្តាល និងភាគកណ្តាល កំពុងកើនឡើងគួរឲ្យព្រួយបារម្ភ ហើយអាងស្តុកទឹកខ្លះ អាចប្រឈមនឹងការបំផ្លាញ ប្រសិនបើតំបន់ទាំងនោះ នៅតែមានបន្តភ្លៀងធ្លាក់ឥតឈប់ឈរ៕