អ៊ីរ៉ង់-អ៊ីរ៉ាក់: បន្ទាប់ពីការជីកកកាយតាមគំនរបាក់បែកនៃសំណង់អគារ ដើម្បីរុករកអ្នករស់រានមានជីវិត ក្រុមភ្នាក់ងារជួយសង្គ្រោះអ៊ីរ៉ង់ នៅថ្ងៃច័ន្ទនេះ បាននិយាយថា ចំនួនអ្នកស្លាប់បានកើនឡើងដល់ ៤៤៧ នាក់ហើយ ក្រោយពីគ្រោះរញ្ជួយដីដ៏ខ្លាំងក្លាមួយកម្រិត ៧,៣ រ៉ិចទ័រ បានវាយប្រហារតំបន់ព្រំដែនអ៊ីរ៉ង់ និងអ៊ីរ៉ាក់។ នេះបើយោងតាមសារព័ត៌មានចិនស៊ិហួ ចេញផ្សាយនៅថ្ងៃទី១៤ ខែវិច្ឆិកា ឆ្នាំ២០១៧។

តាមរបាយការណ៍ បានឲ្យដឹងថា មនុស្សជាច្រើន ត្រូវបានកប់នៅក្នុងគំនរបាក់បែក ដោយក្រៅពីការស្លាប់ ក៏នៅមានអ្នករងរបួសរហូតដល់ ៧,១៥៦ នាក់បន្ថែមទៀត ខណ:កំពុងមានព្រួយបារម្ភតួលេខអ្នកស្លាប់ និងរងរបួស អាចនឹងមានការកើតទ្បើងបន្តទៀត។

ពាក់ព័ន្ធនឹងបញ្ហានេះដែរ អាជ្ញាធរអ៊ីរ៉ង់ បានបញ្ជាក់ឲ្យដឹងថា ចំនួនមនុស្សស្លាប់ និងរបួសភាគច្រើនបំផុត គឺស្ថិតនៅក្នុងប្រទេសអ៊ីរ៉ង់តែម្តង ដោយនៅអ៊ីរ៉ាក់វិញ គឺមានមនុស្សស្លាប់ត្រឹមតែ ០៨នាក់ និងរងរបួស ប្រហែលជាង ២០០នាក់ប៉ុណ្ណោះ។

យោងតាមការអង្កេតការទីតាំងភូមិសាស្ត្រអាមេរិក (USGS) បានឲ្យដឹងថា ចំណុចកណ្តាលនៃការរញ្ជួយនេះ ស្ថិតនៅចម្ងាយប្រមាណ ៣២ គីឡូម៉ែត្រ ពីភាគខាងត្បូងទីក្រុង Halabja ដែលជាតំបន់ភ្នំដាច់ស្រយាលមួយ ស្ថិតនៅភាគខាងកើតប្រទេសអ៊ីរ៉ាក់ ចម្ងាយប្រហែល ២០០ គីឡូម៉ែត្រពីភាគអាគ្នេយ៍នៃទីក្រុងបាកដាដ និង ៤០០គីឡូម៉ែត្រ ពីភាគខាងលិចទីក្រុងតេអេរ៉ង់របស់ប្រទេសអ៊ីរ៉ង់៕