កូរ៉េៈ ក្រុមមន្ត្រីកូរ៉េខាងត្បូង នៅថ្ងៃព្រហស្បតិ៍នេះ បាននិយាយថា មនុស្ស ៥៧ នាក់បានរងរបួស និង ១,៥៣៦ នាក់ទៀត ត្រូវបានគេបញ្ជូនទៅកាន់ទីជម្រកបណ្ដោះអាសន្ន បន្ទាប់ពីគ្រោះរញ្ជួយដីដ៏ធំមួយកម្រិត ៥,៤ រ៉ិចទ័រ បានវាយប្រហារនៅកំពង់ផែ Pohang ភាគអាគ្នេយ៍ប្រទេស កាលពីថ្ងៃពុធ។ នេះបើយោងតាមសារព័ត៌មាន Channel News Asia ចេញផ្សាយនៅថ្ងៃទី១៦ ខែវិច្ឆិកា ឆ្នាំ២០១៧។

ការរញ្ជួយដីលើកទី២ដ៏ខ្លាំងក្លា នៅភាគខាងត្បូងប្រទេស បានវាយប្រហារក្នុងជម្រៅរាក់ ៩ គីឡូម៉ែត្រ កាលពីរសៀលថ្ងៃពុធ ដោយបានធ្វើឲ្យមានសញ្ញាព្រមាន នៅក្នុងប្រទេស ដែលកម្រនឹងជួបប្រទះការរញ្ជួយខ្លាំងបែបនេះណាស់។

ក្រសួងសុវត្ថិភាព បាននិយាយនៅក្នុងសេចក្តីថ្លែងការណ៍មួយថា ការរញ្ជួយនេះ បានកើតទ្បើងនៅទូទាំងប្រទេស ក្នុងនោះរួមទាំងនៅរដ្ឋធានីសេអ៊ូល បានបំផ្លាញផ្ទះជិត ១,១០០ ខ្នង និងសាលារៀនជាង ១០០ អគារ ហើយផ្លូវថ្នល់ ក៏ដូចជាកន្លែងសាធារណៈ រួមទាំងសម្ភារយោធា ក៏ត្រូវបានរងការខូចខាតផងដែរ៕