អាមេរិក: ប្រធានាធិបតីអាមេរិកលោក ដូណាល់ ត្រាំ បានពិភាក្សាតាមទូរស័ព្ទ ជាមួយសមភាគីបារាំង គឺលោក Emmanuel Macron កាលពីថ្ងៃច័ន្ទអំពីស្ថានការណ៍នៅក្នុងប្រទេសស៊ីរី និងបញ្ហាផ្សេងៗទៀត។ នេះបើយោងតាមសារព័ត៌មានចិនស៊ិនហួ ចេញផ្សាយនៅថ្ងៃទី២៨ ខែវិច្ឆិកា ឆ្នាំ២០១៧។

នៅក្នុងសេចក្តីថ្លែងការណ៍មួយរបស់សេតវិមាន បានឲ្យដឹងថា មេដឹកនាំទាំងពីរបានព្រមព្រៀងគ្នាលើសារ:សំខាន់នៃដំណើរការទីក្រុងហ្សឺណែវ ដែលជាវេទិកាតែមួយគត់ សម្រាប់ការសម្រេចបាននូវដំណោះស្រាយនយោបាយ នៅក្នុងប្រទេសស៊ីរី។

តាមរយ:ការសន្ទានតាមទូរសព្ទនោះ លោក ត្រាំ និងលោក Macron ក៏បានពិភាក្សាគ្នា ទាក់ទងនឹងការលុបបំបាត់អាវុធនុយក្លេអ៊ែរ នៅលើឧបទ្វីបកូរ៉េផងដែរ។

ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃច័ន្ទ បានអំពាវនាវឲ្យគ្រប់ភាគីពាក់ព័ន្ធនៅស៊ីរី ចូលរួមយ៉ាងសកម្ម ក្នុងដំណើរការនយោបាយទីក្រុងហ្សឺណែវ ដោយគ្មានលក្ខខណ្ឌ ដែលកិច្ចចរចាសន្តិភាពនេះ គ្រោងនឹងធ្វើនៅថ្ងៃអង្គារខាងមុខ ប៉ុន្តែរដ្ឋាភិបាលស៊ីរី មិនទាន់បានបញ្ជាក់ពីការចូលរួមរបស់ខ្លួននៅឡើយទេ។

គួររំឭកថា ជម្លោះប្រដាប់អាវុធនៅស៊ីរី បានផ្ទុះឡើងកាលពីឆ្នាំ ២០១១ ហើយប្រែក្លាយយ៉ាងឆាប់រហ័សទៅជាសង្គ្រាមស៊ីវិលពេញទី ដែលបានសម្លាប់មនុស្សជាង ៣៣០,០០០ នាក់ ខណ:មនុស្សរាប់ពាន់នាក់ទៀត បានរត់ភៀសខ្លួនចេញពីប្រទេសផងដែរ៕