អាមេរិក: មេដឹកនាំកំពូលកូរ៉េខាងជើង លោក គីម ជុងអ៊ុន នៅថ្ងៃច័ន្ទនេះ បានជំរុញឲ្យផលិតក្បាលគ្រាប់នុយក្លេអ៊ែរ និងមីស៊ីលដ៏ច្រើនសន្ធឹកសន្ធាប់ ដោយលោកបានលើកទ្បើងថា នឹងបន្តពន្លឿនកម្មវិធីអាវុធរបស់ខ្លួន។ នេះបើយោងតាមសារព័ត៌មាន Channel News Asia ចេញផ្សាយនៅថ្ងៃទី១ ខែមករា ឆ្នាំ២០១៨។

រហូតមកទល់ពេលនេះ ក្រុងព្យុងយ៉ាង នៅតែបន្តការខិតខំប្រឹងប្រែងរបស់ពួកគេ ដើម្បីក្លាយជាប្រទេសនុយក្លេអ៊ែរ បើទោះបីជាមានការដាក់ទណ្ឌកម្មពីអន្តរជាតិ និងការបង្កើនសម្ពាធពីអាមេរិកយ៉ាងណាក៏ដោយ។

ជាក់ស្ដែងនៅក្នុងសុន្ទរកថាសារព័ត៌មានប្រចាំឆ្នាំ លោក គីម បាននិយាយថា « ប្រទេសយើង (កូរ៉េខាងជើង) ត្រូវតែផលិតក្បាលគ្រាប់នុយក្លេអ៊ែរ និងមីស៊ីលផ្លោងអន្តរទ្វីប រួមទាំងពន្លឿនការដាក់ពង្រាយរបស់ខ្លួនផងដែរ។

ក្នុងនោះលោកក៏បានរំឭកពីអធិបតីភាពខ្លួន ដែលចូលរួមពិនិត្យក្នុងសាកល្បងមីស៊ីលជាច្រើនដង នៅក្នុងឆ្នាំ ២០១៧ រួមទាំងការបំផ្ទុះក្បាល់គ្រាប់នុយក្លេអ៊ែរទី៦ ដ៏មានឥទ្ធិពលបំផុតរបស់ខ្លួន ដែលមានគោលដៅតម្រង់ទៅលើដីគោករបស់អាមេរិក៕