អាហ្វហ្គានីស្ថាន: សេចក្តីថ្លែងការណ៍មួយរបស់យោធា នៅថ្ងៃពុធនេះ បាននិយាយថា កងទ័ពជាតិអាហ្វហ្គានបានរកឃើញ និងដោះគ្រាប់បែកឆ្នៃចំនួន ៤៩គា្រប់ នៅខេត្តពីរភាគខាងត្បូងប្រទេស។ នេះបើយោងតាមរយ: សារព័ត៌មានចិនស៊ិនហួរ ចេញផ្សាយនៅថ្ងៃទី១៥ ខែមិថុនា ឆ្នាំ២០១៦។

ក្រុមវិស្វកម្មនៃកងទ័ពជាតិអាហ្វហ្គានីស្ថាន 205 Attal Corps ក្នុងអំឡុងពេលប្រតិបត្តិការយោធា បានរកឃើញ និងដោះមីនចំនួន ៤៩គ្រាប់ នៅក្នុងស្រុក Shahjoy ភាគខាងត្បូងខេត្ត Zabul និងស្រុក Dihrawud ក្នុងខេត្ត Uruzgan អស់រយ:ពេល ២៤ម៉ោង។

ខណ:ដែលការវាយឆ្មក់ខាងលើ ភេរវជនម្នាក់ ឈ្មោះ Mir Kalam ត្រូវបានចាប់ឃុំខ្លួនផងដែរ។

ក្រុមសកម្មប្រយុទ្ធតាលីបង់ បានប្រើប្រាស់ឧបករណ៍គ្រាប់រំសេវផ្ទុះ ដើម្បីកំណត់គោលដៅកងកម្លាំងសន្តិសុខ ប៉ុន្តែអាវុធទាំងនោះ បានបណ្ដាលឲ្យស្លាប់ និងរងរបួសដល់ជនស៊ីវិលផងដែរ នេះបើយោងតាមមន្រ្តីយោធា បានប្រាប់ឲ្យដឹង។

កាលពីឆ្នាំ ២០១៥ ជនស៊ីវិលជាង ៣.៥៤០ នាក់ត្រូវបានសម្លាប់ និង ៧.៤៥០ នាក់ទៀតរងរបួស ក្នុងអំពើហិង្សារាលដាលនៅកន្លែងផ្សេងៗគ្នា នៃប្រទេស នេះបើយោងតាមរបាយការណ៍ដែលចេញផ្សាយ ដោយបេសកម្មអង្គការ សហប្រជាជាតិ នៅអាហ្វហ្គានីស្ថាន៕