ចិន: បក្សកុម្មុយនីស្តគ្រប់គ្រងប្រទេសចិន បានស្នើលុបចោលរដ្ឋធម្មនុញ្ញ ដែលកំណត់អាណត្តិប្រធានាធិបតី ដែលវានឹងអនុញ្ញាតឲ្យលោក ស៊ី ជីនពីង អាចបន្តធ្វើជាមេដឹកនាំប្រទេសតទៅមុខទៀត បើទោះបីលោក ត្រៀមនឹងចុះចេញពីតំណែងក៏ដោយ។ នេះបើយោងតាមសារព័ត៌មាន Channel News Asia ចេញផ្សាយនៅថ្ងៃទី២៥ ខែមករា ឆ្នាំ២០១៨។
ចំណាត់ការនេះ បានធ្វើឲ្យមានការភ្ញាក់ផ្អើលយ៉ាងខ្លាំង ខណ:លោក ស៊ី ត្រូវបានគេមើលឃើញថា នឹងស្វះស្វែងពង្រីកអាណត្តិរបស់លោកឲ្យហួសពីឆ្នាំ ២០២៣ តាមរយ:ការស្នើឲ្យមានការលុបចោល ការកំណត់អាណត្តិប្រធានាធិបតីចិន ដែលពីមុនចែងថា អាចកាន់បានពីរអណត្តិជាប់គ្នា ដោយក្នុង១អាណត្តិមានរយ:ពេលត្រឹម ៥ឆ្នាំប៉ុណ្ណោះ។
សូមជំរាបថា លោក ស៊ី គឺជាមេដឹកនាំដ៏មានឥទ្ធិពលបំផុត ចាប់តាំងពីបានក្លាយខ្លួនជាប្រធានាធិបតីចិនក្នុងឆ្នាំ ២០១៣ ដោយលោកបាននាំមកនូវកំណែទម្រង់សេដ្ឋកិច្ច យុទ្ធនាការប្រយុទ្ធប្រឆាំងនឹងអំពើពុករលួយដ៏ខ្លាំងក្លា ជាមួយនឹងលទ្ធិជាតិនិយម និងការបង្ក្រាបលើសិទ្ធិមនុស្ស៕
មតិយោបល់